Акафист святителю Николаю чудотворцу
This gallery contains 1 photo.
Акафист святителю Николаю чудотворцу
Кондак 1
Возбра́нный Чудотво́рче и изря́дный уго́дниче Христо́в, ми́ру всему́ источа́яй многоце́нное ми́лости ми́ро и неисчерпа́емое чуде́с мо́ре, восхваля́ю тя любо́вию, святи́телю Нико́лае; ты же, я́ко име́яй дерзнове́ние ко Го́споду, от вся́ких мя бед свободи́, да зову́ ти:
Ра́дуйся, Нико́лае, вели́кий Чудотво́рче.
Икос 1
А́нгела о́бразом, земна́го су́ща естество́м, яви́ тебе́ всея́ тва́ри Созда́тель: благопло́дную бо добро́ту души́ твоея́ прови́дев, преблаже́нне Нико́лае, научи́ всех вопи́ти тебе́ си́це:
Ра́дуйся, от утро́бы ма́терния очище́нный; ра́дуйся, да́же до конца́ освяще́нный.
Ра́дуйся, рожде́нием свои́м роди́телей удиви́вый; ра́дуйся, си́лу душе́вную а́бие по рождестве́ яви́вый.
Ра́дуйся, са́де земли́ обетова́ния; ра́дуйся, цве́те Боже́ственнаго сажде́ния.
Ра́дуйся, лозо́ доброде́тельная виногра́да Христо́ва; ра́дуйся, дре́во чудото́чное рая́ Иису́сова.
Ра́дуйся, кри́не ра́йскаго прозябе́ния; ра́дуйся, ми́ро Христо́ва благоуха́ния.
Ра́дуйся, я́ко тобо́ю отго́нится рыда́ние; ра́дуйся, я́ко тобо́ю прино́сится ра́дование.
Ра́дуйся, Нико́лае, вели́кий Чудотво́рче.
Кондак 2
Ви́дяще твои́х мир излия́ние, Богому́дре, просвеща́емся душа́ми и телесы́, ди́внаго тя мирото́чца живоно́сна, Нико́лае, разуме́юще: чудесы́ бо, я́ко вода́ми, благода́тию Бо́жиею излива́ющимися, напая́еши ве́рно вопию́щих Бо́гу: Аллилу́иа.
Икос 2
Ра́зум неуразуме́нный вразумля́я о Святе́й Тро́ице, был еси́ в Нике́и со святы́ми отцы́ побо́рник испове́дания правосла́вныя ве́ры: ра́вна бо Отцу́ Сы́на испове́дал еси́, соприсносу́щна и сопресто́льна, А́рия же безу́мнаго обличи́л еси́. Сего́ ра́ди ве́рнии научи́шася воспева́ти тебе́:
Ра́дуйся, вели́кий благоче́стия сто́лпе; ра́дуйся, ве́рных прибе́жища гра́де.
Ра́дуйся, тве́рдое Правосла́вия укрепле́ние; ра́дуйся, честно́е Пресвяты́я Тро́ицы носи́ло и похвале́ние.
Ра́дуйся, Отцу́ равноче́стна Сы́на пропове́давый; ра́дуйся, А́рия возбеси́вшагося от Собо́ра святы́х отгна́вый.
Ра́дуйся, о́тче, отце́в сла́вная красото́; ра́дуйся, всех богому́дрых прему́драя добро́то.
Ра́дуйся, о́гненная словеса́ испуща́яй; ра́дуйся, до́бре ста́до свое́ наставля́яй.
Ра́дуйся, я́ко тобо́ю ве́ра утвержда́ется; ра́дуйся, я́ко тобо́ю е́ресь низлага́ется.
Ра́дуйся, Нико́лае, вели́кий Чудотво́рче.
Кондак 3
Си́лою, да́нною ти свы́ше, слезу́ вся́ку отъя́л еси́ от лица́ лю́те стра́ждущих, богоно́сне о́тче Нико́лае: а́лчущим бо яви́лся еси́ корми́тель, в пучи́не морсте́й су́щим изря́дный прави́тель, неду́гующим исцеле́ние и всем всяк помо́щник показа́лся еси́, вопию́щим Бо́гу: Аллилу́иа.
Икос 3
Име́яше вои́стину, о́тче Нико́лае, с Небесе́ песнь тебе́ воспева́ема быти, а не от земли́: ка́ко бо кто от челове́к возмо́жет твоея́ святы́ни вели́чия пропове́дати? Но мы, любо́вию твое́ю побежда́еми, вопие́м ти си́це:
Ра́дуйся, о́бразе а́гнцев и па́стырей; ра́дуйся, свято́е очисти́лище нра́вов.
Ра́дуйся, доброде́телей вели́ких вмести́лище; ра́дуйся, святы́ни чи́стое и честно́е жили́ще.
Ра́дуйся, свети́льниче всесве́тлый и вселюби́мый; ра́дуйся, све́те златоза́рный и непоро́чный.
Ра́дуйся, досто́йный А́нгелов собесе́дниче; ра́дуйся, до́брый челове́ков наста́вниче.
Ра́дуйся, пра́вило ве́ры благочести́выя; ра́дуйся, о́бразе кро́тости духо́вныя.
Ра́дуйся, я́ко тобо́ю от страсте́й теле́сных избавля́емся; ра́дуйся, я́ко тобо́ю сла́достей духо́вных исполня́емся.
Ра́дуйся, Нико́лае, вели́кий Чудотво́рче.
Кондак 4
Бу́ря недоуме́ния смуща́ет ми ум, ка́ко досто́йно есть пе́ти чудеса́ твоя́, блаже́нне Нико́лае? Никто́же бо мо́жет я исчести́, а́ще бы и мно́ги язы́ки име́л и глаго́лати восхоте́л; но мы, ди́вно Бо́гу в тебе́ прославля́ющемуся, дерза́ем воспева́ти: Аллилу́иа.
Икос 4
Слы́шаша, богому́дре Нико́лае, бли́жнии и да́льнии вели́чие чуде́с твои́х, я́ко по возду́ху ле́гкими благода́тными крила́ми навы́кл еси́ су́щих в беда́х предваря́ти, ско́ро от тех избавля́я всех, вопию́щих к тебе́ такова́я:
Ра́дуйся, избавле́ние от печа́ли; ра́дуйся, подая́ние благода́ти.
Ра́дуйся, неча́емых зол прогони́телю; ра́дуйся, жела́емых благи́х насади́телю.
Ра́дуйся, ско́рый уте́шителю в беде́ су́щих; ра́дуйся, стра́шный наказа́телю оби́дящих.
Ра́дуйся, чуде́с пучи́но, Бо́гом излия́нная; ра́дуйся, зако́на Христо́ва скрижа́ли, Бо́гом пи́санныя.
Ра́дуйся, кре́пкое па́дающих возведе́ние; ра́дуйся, пра́во стоя́щих утвержде́ние.
Ра́дуйся, я́ко тобо́ю всякая лесть обнажа́ется; ра́дуйся, я́ко тобо́ю всякая и́стина сбыва́ется.
Ра́дуйся, Нико́лае, вели́кий Чудотво́рче.
Кондак 5
Боготе́чная звезда́ яви́лся еси́, наставля́я по мо́рю пла́вающих лю́те, и́мже смерть предстоя́ше вско́ре иногда́, а́ще не бы ты предста́л еси́ призыва́ющим тя в по́мощь, Чудотво́рче святы́й Нико́лае; уже́ бо несты́дно бесо́м лета́ющим и погрузи́ти корабли́ хотя́щим запрети́в, отгна́л еси́ их, ве́рныя же научи́л еси́ спаса́ющему тобо́ю Бо́гу взыва́ти: Аллилу́иа.
Икос 5
Ви́деша отрокови́цы, на брак скве́рный нищеты́ ра́ди угото́ванныя, вели́кое твое́ к ни́щим милосе́рдие, преблаже́нне о́тче Нико́лае, егда́ ста́рцу роди́телю их но́щию узельцы́ три зла́та тая́ся пода́л еси́, самаго́ со дще́рьми избавля́я от паде́ния грехо́внаго. Того́ ра́ди слы́шиши от всех си́це:
Ра́дуйся, ми́лости превели́кия сокро́вище; ра́дуйся, промышле́ния о лю́дех прия́телище.
Ра́дуйся, пи́ще и отра́до к тебе́ прибега́ющих; ра́дуйся, хле́бе неснеда́емый а́лчущих.
Ра́дуйся, бога́тство, бе́дне живу́щим на земли́, Бо́гом да́нное; ра́дуйся, воздви́жение ско́рое убо́гих.
Ра́дуйся, бы́строе ни́щих услы́шание; ра́дуйся, скорбя́щих прия́тное попече́ние.
Ра́дуйся, трие́х дев непоро́чный невести́телю; ра́дуйся, чистоты́ усе́рдный храни́телю.
Ра́дуйся, ненаде́жных наде́яние; ра́дуйся, всего́ ми́ра наслажде́ние.
Ра́дуйся, Нико́лае, вели́кий Чудотво́рче.
Кондак 6
Пропове́дует мир весь тебе́, преблаже́нне Нико́лае, ско́раго в беда́х засту́пника: я́ко мно́гажды во еди́нем часе́, по земли́ путеше́ствующим и по мо́рю пла́вающим, предваря́я, посо́бствуеши, ку́пно всех от злых сохраня́я, вопию́щих к Бо́гу: Аллилу́иа.
Икос 6
Возсия́л еси́ свет живо́тный, избавле́ние нося́ воево́дам, непра́ведную смерть прия́ти иму́щим, тебе́, до́брый па́стырю Нико́лае, призыва́ющим, егда́ вско́ре я́влься во сне царе́ви, устраши́л еси́ его́, сих же неврежде́нных отпусти́ти повеле́л еси́. Сего́ ра́ди с ни́ми ку́пно и мы благода́рственно вопие́м ти:
Ра́дуйся, усе́рдно призыва́ющим тя помога́яй; ра́дуйся, от непра́веднаго убие́ния избавля́яй.
Ра́дуйся, от ле́стныя сохраня́яй клеветы́; ра́дуйся, непра́ведныя разруша́яй сове́ты.
Ра́дуйся, растерза́яй лжу я́ко паучи́ну; ра́дуйся, возноша́яй сла́вно и́стину.
Ра́дуйся, непови́нных от уз разреше́ние; ра́дуйся, и мертвеце́в оживле́ние.
Ра́дуйся, прояви́телю пра́вды; ра́дуйся, помрачи́телю непра́вды.
Ра́дуйся, я́ко тобо́ю непови́ннии избавлени от меча́; ра́дуйся, я́ко тобо́ю наслади́шася све́та.
Ра́дуйся, Нико́лае, вели́кий Чудотво́рче.
Кондак 7
Хотя́ богоху́льное ерети́ческое отгна́ти злосмра́дие, ми́ро вои́стину благово́нное, та́инственное яви́лся еси́, Нико́лае: лю́ди Мире́йския упа́сл еси́ и весь мир свои́м благода́тным ми́ром испо́лнил еси́. И от нас у́бо богоме́рзкое грехо́вное злосмра́дие отжени́, да благоприя́тно Бо́гу вопие́м: Аллилу́иа.
Икос 7
Но́ваго тя Но́я, наста́вника ковче́га спаси́тельнаго разуме́ем, о́тче святы́й Нико́лае, бу́рю всех лю́тых разгоня́ющаго направле́нием свои́м, тишину́ же Боже́ственную принося́щаго вопию́щим такова́я:
Ра́дуйся, обурева́емых ти́хое приста́нище; ра́дуйся, утопа́ющих изве́стное храни́лище.
Ра́дуйся, пла́вающих посреде́ пучи́н до́брый ко́рмчий; ра́дуйся, треволне́ния морска́я уставля́ющий.
Ра́дуйся, превожде́ние су́щих в ви́хрех; ра́дуйся, согре́яние су́щих во мра́зех.
Ра́дуйся, сия́ние, ско́рбный мрак разгоня́ющее; ра́дуйся, свети́ло, вся концы́ земли́ просвеща́ющее.
Ра́дуйся, от бе́здны грехо́вныя челове́ки избавля́яй; ра́дуйся, в бе́здну а́дскую сатану́ вверга́яй.
Ра́дуйся, я́ко тобо́ю дерзнове́нно бе́здну милосе́рдия Бо́жия призыва́ем; ра́дуйся, я́ко тобо́ю от пото́па гнева изба́вльшеся, мир с Бо́гом обрета́ем.
Ра́дуйся, Нико́лае, вели́кий Чудотво́рче.
Кондак 8
Стра́нное чу́до явля́ется притека́ющим к тебе́, блаже́нне Нико́лае, свяще́нная твоя́ це́рковь: в ней бо и ма́лое моле́ние принося́ще, ве́лиих неду́гов прие́млем исцеле́ние, а́ще то́кмо по Бо́зе упова́ние на тя возложи́м, ве́рно вопию́ще: Аллилу́иа.
Икос 8
Весь еси́ всем вои́стину помо́щник, богоно́се Нико́лае, и собра́л еси́ вку́пе вся прибега́ющия к тебе́, я́ко свободи́тель, пита́тель и врач ско́рый всем земны́м, на похвалу́ всех подвизая вопи́ти к тебе́ си́це:
Ра́дуйся, вся́ких исцеле́ний исто́чниче; ра́дуйся, лю́те стра́ждущим помо́щниче.
Ра́дуйся, заре́, сия́ющая в нощи́ грехо́вней блужда́ющим; ра́дуйся, росо́ небото́чная в зно́и трудо́в су́щим.
Ра́дуйся, подава́яй тре́бующим благострое́ние; ра́дуйся, уготовля́яй прося́щим изоби́лие.
Ра́дуйся, мно́гажды проше́ние предваря́яй; ра́дуйся, ста́рым седи́нам си́лу обновля́яй.
Ра́дуйся, мно́гих заблу́ждших от пути́ и́стиннаго обличи́телю; ра́дуйся, та́ин Бо́жиих ве́рный служи́телю.
Ра́дуйся, я́ко тобо́ю за́висть попира́ем; ра́дуйся, я́ко тобо́ю благонра́вное житие́ исправля́ем.
Ра́дуйся, Нико́лае, вели́кий Чудотво́рче.
Кондак 9
Вся́кия утоли́ боле́зни, вели́кий наш засту́пниче Нико́лае, растворя́я благода́тная врачева́ния, услажда́ющая ду́ши на́ша, сердца́ же веселя́щая всех усе́рдно к по́мощи твое́й притека́ющих, Бо́гу же вопию́щих: Аллилу́иа.
Икос 9
Вити́я суему́дренныя нечести́вых ви́дим тобо́ю посра́мленныя, богому́дре о́тче Нико́лае: А́рия бо ху́льника, разделя́юща Божество́, и Саве́ллия, смеша́юща Святу́ю Тро́ицу, препре́л, нас же во Правосла́вии укрепи́л еси́. Сего́ ра́ди вопие́м ти си́це:
Ра́дуйся, щи́те, защища́яй благоче́стие; ра́дуйся, мечу́, посеца́яй злоче́стие.
Ра́дуйся, учи́телю Боже́ственных веле́ний; ра́дуйся, губи́телю богопроти́вных уче́ний.
Ра́дуйся, ле́ствице, Бо́гом утвержде́нная, е́юже восхо́дим к Небеси́; ра́дуйся, покро́ве, Бо́гом зда́нный, и́мже покрыва́ются мно́зи.
Ра́дуйся, нему́дрых умудри́вый твои́ми словесы́; ра́дуйся, лени́вых подви́гнувый твои́ми нра́вы.
Ра́дуйся, све́тлосте за́поведей Бо́жиих неугаси́мая; ра́дуйся, луче́ оправда́ний Госпо́дних пресве́тлая.
Ра́дуйся, я́ко уче́нием твои́м сокруша́ются ерети́ческия главы́; ра́дуйся, я́ко тобо́ю ве́рнии сподобля́ются сла́вы.
Ра́дуйся, Нико́лае, вели́кий Чудотво́рче.
Кондак 10
Спасти́ хотя́ ду́шу, плоть твою́ ду́хови покори́л еси́ вои́стину, о́тче наш Нико́лае: молча́ньми бо пре́жде и боре́ньми с по́мыслы, дея́нию богомы́слие приложи́л еси́, богомы́слием же ра́зум соверше́н стяжа́л еси́, и́мже дерзнове́нно с Бо́гом и А́нгелы бесе́довал еси́, всегда́ вопия́: Аллилу́иа.
Икос 10
Стена́ еси́ похваля́ющим, преблаже́нне, чудеса́ твоя́ и всем к заступлению твоему́ прибега́ющим; те́мже и нас, в доброде́тели убо́гих, от нищеты́, напа́сти, неду́гов и нужд разли́чных свобожда́й, вопию́щих ти с любо́вию такова́я:
Ра́дуйся, от убо́жества ве́чнаго изыма́яй; ра́дуйся, бога́тство нетле́нное подава́яй.
Ра́дуйся, бра́шно неги́блющее а́лчущим пра́вды; ра́дуйся, питие́ неисчерпа́емое жа́ждущим жи́зни.
Ра́дуйся, от мяте́жа и бра́ни соблюда́яй; ра́дуйся, от уз и плене́ния свобожда́яй.
Ра́дуйся, пресла́вный в беда́х засту́пниче; ра́дуйся, превели́кий в напа́стех защи́тниче.
Ра́дуйся, мно́гих от поги́бели исхи́тивый; ра́дуйся, безчи́сленных неврежде́нно сохрани́вый.
Ра́дуйся, я́ко тобо́ю лю́тыя сме́рти гре́шнии избега́ют; ра́дуйся, я́ко тобо́ю жизнь ве́чную ка́ющиися получа́ют.
Ра́дуйся, Нико́лае, вели́кий Чудотво́рче.
Кондак 11
Пе́ние Пресвяте́й Тро́ице па́че ины́х прине́сл еси́, преблаже́нне Нико́лае, умо́м, сло́вом и де́лом: мно́гим бо испыта́нием правове́рная повеле́ния уясни́л еси́, ве́рою, наде́ждою и любо́вию наставля́я нас в Тро́ице Еди́ному Бо́гу воспева́ти: Аллилу́иа.
Икос 11
Светоза́рную лучу́ во мра́це жития́ су́щим неугаси́мую ви́дим тя, Бо́гом избра́нне о́тче Нико́лае: с невеще́ственными бо а́нгельскими све́ты бесе́дуеши о несозда́нном Тро́ическом Све́те, ве́рных же ду́ши просвеща́еши, вопию́щих ти такова́я:
Ра́дуйся, озаре́ние Трисо́лнечнаго Све́та; ра́дуйся, денни́це незаходи́маго Со́лнца.
Ра́дуйся, свеще́, Боже́ственным пла́менем возжже́нная; ра́дуйся, я́ко угаси́л еси́ бесо́вский пла́мень нече́стия.
Ра́дуйся, све́тлое правове́рия пропове́дание; ра́дуйся, доброзра́чное све́та ева́нгельскаго сия́ние.
Ра́дуйся, мо́лние, е́реси пожига́ющая; ра́дуйся, гро́ме, устраша́ющий соблазня́ющия.
Ра́дуйся, и́стиннаго научи́телю ра́зума; ра́дуйся, та́инственнаго изъяви́телю ума́.
Ра́дуйся, я́ко тобо́ю попра́ся поклонение тва́ри; ра́дуйся, я́ко тобо́ю научи́хомся покланя́тися Творцу́ в Тро́ице.
Ра́дуйся, Нико́лае, вели́кий Чудотво́рче.
Кондак 12
Благода́ть, да́нную ти от Бо́га, све́дущии, ра́дующеся, твою́ па́мять пра́зднуем по до́лгу, пресла́вный о́тче Нико́лае, и к чу́дному заступлению твоему́ вседу́шно притека́ем; пресла́вных же твои́х дея́ний, я́ко песка́ морска́го и мно́жества зве́зднаго исчести́ не могу́ще, недоуме́нием объя́ти бы́вше, вопие́м к Бо́гу: Аллилу́иа.
Икос 12
Пою́ще твоя́ чудеса́, восхваля́ем тя, всехва́льне Нико́лае: в тебе́ бо Бог, в Тро́ице прославля́емый, ди́вно просла́вися. Но а́ще и попремно́гу соста́вленныя от души́ псалмы́ и пе́сни прино́сим ти, Чудотво́рче святы́й, ничто́же твори́м ра́вно дарова́нию чуде́с твои́х, и́мже удивля́ющеся, вопие́м к тебе́ такова́я:
Ра́дуйся, Царя́ ца́рствующих и Го́спода госпо́дствующих служи́телю; ра́дуйся, служи́телей Его́ небе́сных сожи́телю.
Ра́дуйся, лю́дем ве́рным поможе́ние; ра́дуйся, ро́да христиа́нскаго возвыше́ние.
Ра́дуйся, побе́ды тезоимени́тый; ра́дуйся, венцено́сче наро́читый.
Ра́дуйся, всех доброде́телей зерца́ло; ра́дуйся, всех притека́ющих к тебе́ кре́пкое забра́ло.
Ра́дуйся, по Бо́зе и Богоро́дице, все на́ше упова́ние; ра́дуйся, теле́с на́ших здра́вие и душ спасе́ние.
Ра́дуйся, я́ко тобо́ю от ве́чныя сме́рти свобожда́емся; ра́дуйся, я́ко тобо́ю безконе́чныя жи́зни сподобля́емся.
Ра́дуйся, Нико́лае, вели́кий Чудотво́рче.
Кондак 13
О пресвяты́й и пречу́дный о́тче Нико́лае, утеше́ние всех скорбя́щих, ны́нешнее на́ше приими́ приноше́ние и от гее́нны избавитися нам Го́спода умоли́ богоприятным твои́м хода́тайством, да с тобо́ю воспева́ем: Аллилу́иа.
Этот кондак читается трижды, зате́м 1-й икос «А́нгела о́бразом…» и 1-й кондак «Возбра́нный Чудотво́рче и изря́дный уго́дниче…»
Моли́тва первая
О всесвяты́й Нико́лае, уго́дниче преизря́дный Госпо́день, те́плый наш засту́пниче и везде́ в ско́рбех ско́рый помо́щниче! Помози́ ми, гре́шному и уны́лому, в настоя́щем сем житии, умоли́ Го́спода Бо́га дарова́ти ми оставле́ние всех мои́х грехо́в, ели́ко согреши́х от ю́ности моея́, во всем житии мое́м, де́лом, сло́вом, помышле́нием и все́ми мои́ми чу́вствы; и во исхо́де души́ моея́ помози́ ми, окая́нному, умоли́ Го́спода Бо́га всея́ тва́ри Соде́теля, изба́вити мя воздушных мыта́рств и ве́чнаго муче́ния: да всегда́ прославля́ю Отца́, и Сы́на, и Свята́го Ду́ха, и твое́ ми́лостивное предста́тельство, ны́не и при́сно, и во ве́ки веко́в. Ами́нь.
Моли́тва вторая
О всеблаги́й о́тче Нико́лае, па́стырю и учи́телю всех, ве́рою притека́ющих ко твоему́ заступлению и те́плою моли́твою тебе́ призыва́ющих! Ско́ро потщи́ся и изба́ви Христо́во ста́до от волко́в губя́щих е; и вся́ку страну́ христианскую огради́ и сохрани́ святы́ми твои́ми моли́твами от мирска́го мяте́жа, тру́са, наше́ствия иноплеме́нников и междоусо́бныя бра́ни, от гла́да, пото́па, огня́, меча́ и внеза́пныя сме́рти. И я́коже поми́ловал еси́ трие́х муже́й, в темни́це седя́щих, и изба́вил еси́ их от царе́ва гнева и посече́ния ме́чнаго, та́ко поми́луй и мене́, умо́м, сло́вом и де́лом во тме грехо́в су́ща, и изба́ви мя гнева Бо́жия и ве́чныя ка́зни. Я́ко да твои́м хода́тайством и по́мощию, Свои́м же милосе́рдием и благода́тию, Христо́с Бог ти́хое и безгре́шное житие́ даст ми пожи́ти в веце сем, и изба́вит мя от шу́ияго стоя́ния, сподо́бит же десна́го со все́ми святы́ми во ве́ки веко́в. Ами́нь.
Акафист Архангелу Божию Михаилу
This gallery contains 1 photo.
Акафист Архангелу Божию Михаилу
Кондак 1
Избранный Небесных сил воеводо и рода человеческаго заступниче, сие тебе иже тобою от скорбных избавляеми, благодарственное приносим пение: ты же, яко предстояй Престолу Царя Славы, от всяких нас бед свобождай, да с верою и любовию в похвалу тебе зовем:
Радуйся, Михаиле, великий Архистратиже, со всеми Небесными силами.
Икос 1
Яко ангельских огнезрачных ликов предстоятеля, ангельскими убо и языки подобаше восхвалите тя, Михаиле: но дондеже вразумляеми тобою навыкнем безплотных глаголом, услыши, аще и от человеческих, обаче благодарных устен, сицевая:
Радуйся, звездо мира первообразная; радуйся, свеще истины и правды златозарная.
Радуйся, лучей света несозданнаго первый во ангельских ликостояниях преимниче; радуйся, Ангелов начальниче.
Радуйся, в немже наивящше светлеется слава Творческия Десницы; радуйся, имже красуются соборы всех существ безплотных.
Радуйся, Михаиле, великий Архистратиже, со всеми Небесными силами.
Кондак 2
Провидяще веры очесы величие духовныя красоты и силу молниеносныя десницы твоея, Архангеле Божий, мы, яко земнии и плотию обложеннии, удивлением, радостию и благодарением ко Творцу всяческих исполняемся, зовуще со всеми Небесными силами: Аллилуиа.
Икос 2
Разум чист и свободен от страстей испроси нам, пречудный Михаиле, Небесных чинов начальниче, да, вознесшеся мыслию от земных к Небесным, хвалебную песнь воспоем ти сице:
Радуйся, Божия неизреченныя красоты и доброты ближайший зрителю; радуйся, всеблагих советов Пресвятыя Троицы преискренний таинниче.
Радуйся, превечных судеб Троических верный исполнителю; радуйся, емуже с любовию удивляются Небесная воинства.
Радуйся, егоже с верою прославляют земнороднии; радуйся, егоже трепещут адския силы.
Радуйся, Михаиле, великий Архистратиже, со всеми Небесными силами.
Кондак 3
Силу необоримыя ревности по славе Божией в себе являя, стал еси во главе ликов ангельских, Михаиле, противу дышащаго злобою, прегордаго Денницы, емуже со темными клевреты его с высоты небесныя в преисподнюю низвержену сущу, воинства Небесная, тобою преславне водимая, с веселием, яко едиными усты, пред Престолом Божиим возгласиша: Аллилуиа.
Икос 3
Имать тебе, Архангеле Михаиле, весь род христианский велика заступника и дивна во бранех с противными помощника: сего ради пречуднаго покрова твоего сподобитися желающе, в день торжества твоего взываем ти сице:
Радуйся, имже сатана, яко молния, с Небесе низвержеся; радуйся, имже хранимый род человеческий к Небеси восходит.
Радуйся, всесветлаго мира Горняго предивное украшение; радуйся, падшаго мира дольняго преславное заступление.
Радуйся, николиже силами зла побежденный; радуйся, со всеми Ангелы Божиими в истине и правде на веки благодатию Божиею утвержденный.
Радуйся, Михаиле, великий Архистратиже, со всеми Небесными силами.
Кондак 4
Бури искушений и бед избави нас, Ангелов первопрестольниче, с любовию и радостию пресветлое торжество твое совершающих: ты бо еси в бедах великий помощник и в час смерти от злых духов хранитель и заступник всех вопиющих твоему и нашему Владыце и Богу: Аллилуиа.
Икос 4
Видяще твое противу полчищ сатанинских дерзновение, вси чинове ангельстии с радостию подвигошася во след тебе на брань за имя и славу своего Владыки, вопиюще: кто яко Бог? Мы же, ведуще сатану под ногама твоима повержена, тебе, яко победителю, зовем:
Радуйся, имже мир и тишина на Небеси водворишася; радуйся, от негоже духове злобы даже до ада низложишася.
Радуйся, ангельския воинства и силы мира невидимаго ко истреблению зла направляяй; радуйся, прю и возмущение стихий мира видимаго незримо укрощаяй.
Радуйся, подъемлющих брань к духовом злобы поднебесным дивный споборниче; радуйся, изнемогающих во искушениих и напастех века сего крепкий помощниче.
Радуйся, Михаиле, великий Архистратиже, со всеми Небесными силами.
Кондак 5
Боготочный источник превеликих чудес явился еси во храме твоем, иже в Хонех; не точию бо змий великий и страшный, на месте том пребывавый, силою твоею потребися, но и струи водныя, всякий недуг телесный врачующия, открышася, да вси прославляющему тя Владыце Ангелов с верою зовут: Аллилуиа.
Икос 5
Слышаще и ведуще тя яко светило великое, посреде ликов ангельских блистающася, пречудный Михаиле, к тебе, по Бозе и Пресвятей Матери Божией, прибегаем: озари лучами света твоего всех нас, вопиющих ти сице:
Радуйся, вождю и хранителю в пустыни народа богоизбраннаго; радуйся, высокий посредниче закона, рукою Моисея на Синаи даннаго.
Радуйся, у негоже судии и вожди Израилевы силу и покров обретаху; радуйся, чрез негоже пророцы и первосвященницы иудейстии дар ведения от всеведущаго Бога приимаху.
Радуйся, богобоязненныя законодавцы тайною премудростию снабдеваяй; радуйся, суд и правду творящим благость на сердце полагаяй.
Радуйся, Михаиле, великий Архистратиже, со всеми Небесными силами.
Кондак 6
Провозвестника тя Божиих судеб егда узре некогда Маное, недоумения и страха исполнися, мня не жити ктому на земли; научен же от жены своея о благости явления и кротости словес твоих, в радости о имевшем родитися, по словеси твоему, сыне своем Сампсоне, благодарне возопи Богу: Аллилуиа.
Икос 6
Возсиял еси пречудно славою, Михаиле, егда во образе человечесте пред Иисусом Навином стал еси, глаголя: Иззуй сапог с ногу твоею: аз есмь Архистратиг силы Господни. Таковому явлению твоему чудяшеся, с любовию вопием ти:
Радуйся, боговенчанных глав неусыпный охранителю; радуйся, противляющихся власти, яко Божию повелению противящихся, скорый низложителю.
Радуйся, усмирителю народных треволнений; радуйся, незримый упразднителю злочестивых обычаев.
Радуйся, яко ты просвещаеши сомнящихся в час лютых недоумений; радуйся, яко ты исхищаеши искушаемых от пагубоносных наваждений.
Радуйся, Михаиле, великий Архистратиже, со всеми Небесными силами.
Кондак 7
Хотяй Владыка всяческих показати, яко жребии сынов человеческих не самослучайнии суть, но в деснице Его выну содержатся, даде тя царствам земным заступника и хранителя, да племена и народы к вечному Царствию Божию уготовляеши; сего ради вси, ведущии о велицем служении твоем спасению человеческому, благодарне зовут Богу: Аллилуиа.
Икос 7
Новая чудеса показа нам, Архистратиже, тобою на земли всех чудес Творец и Владыка, егда храм, во имя твое созданный, от потопления водами речными дивно спасл еси, струям потока в недра земная устремитися повелевый: еже видя блаженный Архипп с духовными чады своими, благодарне к тебе возопи:
Радуйся, святых храмов Божиих несокрушимая оградо; радуйся, врагом веры Христовы необоримая преградо.
Радуйся, егоже велению стихии покоряются; радуйся, имже вси злобнии замыслы сокрушаются.
Радуйся, верным радость от Престола Вседержителя износящий; радуйся, неверных на стезю правды и истины приводящий.
Радуйся, Михаиле, великий Архистратиже, со всеми Небесными силами.
Кондак 8
Странное чудо силы твоея, Архистратиже Божий, уведе на себе Аввакум, егда по манию Божию восхитив, принесл еси его скоротечне от Иудеи в Вавилон, дати пищу Даниилу, в рове со львы заключену: темже удивлься превеликому действию силы твоея, возопи с верою: Аллилуиа.
Икос 8
Весь еси в вышних, Михаиле, Престолу Царя Славы предстояй, не далек еси и от нижних, ратуя выну со врагами спасения человеческаго: темже вси вожделеннаго Отечества Небеснаго достигнути хотящии согласно тебе зовут:
Радуйся, начальниче трисвятаго ангельскаго пения; радуйся, земнородных присно готовый предстателю и хранителю.
Радуйся, прегордаго фараона с неверными египтяны поразивый страннообразно; радуйся, верныя иудеи путеводивый в пустыни преславно.
Радуйся, имже угасися пламень пещи вавилонския.
Радуйся, Михаиле, великий Архистратиже, со всеми Небесными силами.
Кондак 9
Вси иноцы Святыя Горы Афонския в радостный трепет приидоша, видяще, како богобоязненна отрока, неистовно от нечестивых златолюбцев во глубину морскую с камнем повержена, спасл еси: темже приявшая его обитель, именем твоим красующися, благодарне взывает ко Господу: Аллилуиа.
Икос 9
Витий глаголы и любомудров смыслы не довлеют ко изглаголанию силы твоея, Михаиле, како во едину нощь сто осмьдесят и пять тысящ поразил еси от воев царя ассирийска Сеннахирима, да накажется прочее не хулити имя Господне: мы же, почитающе святую ревность твою о славе Бога Истиннаго, с веселием зовем ти сице:
Радуйся, православных воинств непобедимый воеводо; радуйся, зловерных ратей страх и низложение.
Радуйся, правыя веры и богопочитания насадителю; радуйся, душевредных ересей и расколов искоренителю.
Радуйся, благочестивыя Маккавеи на поле брани многажды укрепивый; радуйся, нечестиваго вождя Антиохова Илиодора в самем храме поразивый.
Радуйся, Михаиле, великий Архистратиже, со всеми Небесными силами.
Кондак 10
Спастися хотящим нам буди помощник тверд, Архистратиже Божий, избавляяй и храняй нас от бед и напастей, паче же от злых навыков и грехов наших, да, преспевающе в вере, надежде и любви Христове, с радостию о предивнем заступлении твоем, ко Владыце Ангелов и человеков благодарне зовем: Аллилуиа.
Икос 10
Стена еси верующим человеком, Архистратиже Божий, и столп крепок во бранех со врагами видимыми и невидимыми: сего ради от сетей бесовских тобою избавляеми, благодарным сердцем и усты зовем сице:
Радуйся, врагом веры и сопротивником Святыя Церкве непобедимый противоборниче; радуйся, смиренным провозвестником Евангелиа неутомимый споспешниче.
Радуйся, во тьме зловерия седящих светом веры Христовы просвещаяй; радуйся, лжемудрием объюродевших на стезю истины и покаяния наставляяй.
Радуйся, грозный отмстителю клянущимся именем Божиим всуе; радуйся, молниеносный карателю глумящихся безумие о таинствех святыя веры.
Радуйся, Михаиле, великий Архистратиже, со всеми Небесными силами.
Кондак 11
Пение всякое хвалебное побеждается множеством чудес твоих, Архистратиже Божий, яко совершена суть тобою не точию на Небеси и на земли, но и в темных сенех преисподней, идеже глубиннаго змия связал еси узами силы Господней, да избавляемии от злобы его благословят Владыку Небесе и земли, зовуще: Аллилуиа.
Икос 11
Светоносный служитель истины и чистоты богопочитания явился еси, Архистратиже, егда, провидя козни духа тьмы, воспретил еси ему именем Божиим, да не дерзнет сокровенное тело почившаго вождя Израилева Моисеа явити ко обожению чувственным сыновом Израилевым: сего ради, чтуще ныне благосветлый собор твой, благодарне вопием ти:
Радуйся, чистоту боговедения во дни Ветхаго Завета среди иудеев сохранивый; радуйся, плевелы заблуждений во дни Новыя благодати многажды искоренивый.
Радуйся, языческих прорицалищ и кумиров истребителю; радуйся, христианских подвижников и страстотерпцев укрепителю.
Радуйся, немощныя духом силою благодати Божией исполняяй; радуйся, изнемогающия плотию всеоружием веры облекаяй.
Радуйся, Михаиле, великий Архистратиже, со всеми Небесными силами.
Кондак 12
Благодать от Бога с Небесе испроси нам, поющим во славу всечестнаго имене твоего, Михаиле, да, осеняеми твоим заступлением, во всяком благочестии и чистоте поживем, дондеже, отрешеннии смертию от уз плоти, сподобимся предстати огнезрачному Престолу Царя Славы и с лики ангельскими возопити: Аллилуиа.
Икос 12
Поюще многообразная твоя чудеса, Михаиле, во спасение наше содеянная, молим Господа и Владыку всяческих, да дух ревности по славе Божией, иже в тебе, николиже оскудеет и в нас, зовущих ти сице:
Радуйся, верных рабов Божиих во время благопотребно на высоту власти предивне поставляяй; радуйся, продерзых и недостойных с высоты силы и славы незримо низлагаяй.
Радуйся, в день последний избранных от четырех концев земли имеяй собрати; радуйся, имже грешныя, яко плевелы, по гласу Божию, огню вечному преданы будут.
Радуйся, имже сатана со ангелы его во езеро огненное на веки повергнется; радуйся, имже праведнии во обителех Отца Небеснаго преславне водворятся.
Радуйся, Михаиле, великий Архистратиже, со всеми Небесными силами.
Кондак 13
О пречудный Архангелов и Ангелов начальниче, за предивное служение твое спасению рода человеческаго приими от нас возносимый к тебе ныне глас хвалы и благодарения, и яко исполнь силы Божией, покрый нас невещественныма крилома твоима от всех враг видимых и невидимых, да прославляемому тобою и прославившему тя Господу выну зовем: Аллилуиа.
Этот кондак читается трижды, затем 1-й икос «Яко ангельских…» и 1-й кондак «Избранный Небесных сил…»
Молитва
Святый и великий Архангеле Божий Михаиле, неисповедимыя и пресущественныя Троицы первый во Ангелех предстоятелю, рода же человеческаго приставниче и хранителю, сокрушивый с воинствы своими главу прегордаго Денницы на Небеси и посрамляяй выну злобу и коварства его на земли! К тебе прибегаем с верою и тебе молимся с любовию: буди щит несокрушим и забрало твердо Святей Церкви и Православному Отечествию нашему, ограждая их молниеносным мечем твоим от всех враг, видимых и невидимых. Не остави же, о Архангеле Божий, помощию и заступлением твоим и нас, прославляющих днесь святое имя твое: се бо, аще и многогрешни есмы, обаче не хощем в беззакониих наших погибнути, но еже обратитися ко Господу и оживленным быти от Него на дела благая. Озари убо ум наш светом лица Божия, иже выну сияет на молниевиднем челе твоем, да возможем разумети, что есть воля Божия о нас благая и совершенная, и ведети вся, яже подобает нам творити и яже презирати и оставляти. Укрепи благодатию Господнею слабую волю и немощное произволение наше, да, утвердившеся в законе Господнем, престанем прочее влаятися земными помыслы и похотении плоти, увлекающеся, по подобию несмысленных детей, скорогибнущими красотами мира сего, яко ради тленнаго и земнаго безумне забывати вечная и небесная. Над всеми же сими испроси нам Свыше дух истиннаго покаяния, нелицемерную печаль по Бозе и сокрушение о гресех наших, да остающее нам число дней временнаго живота нашего иждивем не во угождении чувств и работе страстем нашим, но во изглаждении зол, содеянных нами, слезами веры и сокрушения сердечнаго, подвигами чистоты и святыми делами милосердия. Егда же приблизится час окончания нашего, освобождения от уз бреннаго сего телесе, не остави нас, Архангеле Божий, беззащитных противу духов злобы поднебесных, обыкших преграждати душе человечестей восход в горняя, да, охраняеми тобою, безпреткновенне достигнем оных преславных селений райских, идеже несть печаль, ни воздыхание, но жизнь безконечная, и, сподобльшеся узрети пресветлое лице Всеблагаго Господа и Владыки нашего, падше со слезами у ног Его, в радости и умилении воскликнем: слава Тебе, дражайший Искупителю наш, Иже за премногую любовь Твою к нам, недостойным, благоволил еси послати Ангелы Твоя в служение спасению нашему! Аминь.
Тропарь, глас 4
Небесных воинств Архистратиже, молим тя присно мы недостойнии, да твоими молитвами оградиши нас кровом крил невещественныя твоея славы, сохраняя нас припадающих прилежно и вопиющих: от бед избави нас, яко чиноначальник высших сил.
Кондак, глас 2
Архистратиже Божий, служителю Божественныя славы, Ангелов начальниче и человеков наставниче, полезное нам проси и велию милость, яко безплотных Архистратиг.
Акафист великомученику и целителю Пантелеимону
This gallery contains 1 photo.
Акафист великомученику и целителю Пантелеимону
Кондак 1
Избранный страстотерпче Христов и врачу благодатный, туне подаяй недугующим исцеления, песньми восхваляем тя, заступника нашего. Ты же, яко имеяй дерзновение ко Господу, от всяких бед и болезней свобождай нас, любовию тебе зовущих: Радуйся, великомучениче и целителю Пантелеимоне.
Икос 1
Ангела земнаго и небеснаго человека вемы тя, славный Пантелеимоне: ангельскою бо непорочностию и мученичеством украшен, преселися еси от земли на Небо, идеже со Ангелы и всеми святыми предстоя Престолу Господа славы, молися о нас, земных, почитающих тя звании сими: Радуйся, светлосте благочестия; радуйся, преславный светильниче Церкви. Радуйся, мучеников пречестных украшение; радуйся, верных в непоколебимом терпении утверждение. Радуйся, юности преизрядная похвало; радуйся, поборниче Христов, в мужестве неодоленный. Радуйся, произрастший в мире, премирен явивыйся; радуйся, ангеле во плоти, превосходяй смертных. Радуйся, небожителю всеблаженный; радуйся, Божественного разума вмести-лище. Радуйся, имже вера возвысися; радуйся, имже прелесть низложися. Радуйся, великомучениче и целителю Пантелеимоне.
Кондак 2
Видя тя Владыка сосуд избран, возлюби души твоея доброту. Ты бо земную всякую сладость и славу презрев, венцем мученическим возжелел еси украситися, уязвлен Божественною любовию, и вдохновенно поя: Аллилуиа.
Икос 2
Разум богодухновен имея, о доблий воителю Пантелеимоне, изумил еси царя Максимиана мужеством души твоея и словесы, имиже дерзновенно проповедал еси Христа. Темже похваляюще дерзновение твое, глаголем ти сице: Радуйся, угрозы Максимиана презревый; радуйся, советом нечестивых непокоривыйся. Радуйся, насаждение истиннаго богопочитания; радуйся, искоренение демонскаго служения. Радуйся, неистовства мучителей изобличителю; радуйся, идольския прелести низложителю. Радуйся, разгнавый нечестивых соборища; радуйся, пременивый тленная на Небесная. Радуйся, собеседниче невещественных Ангелов; радуйся, сликовствователю многострадальных святых. Радуйся, имже сатана посрамися; радуйся, имже Христос прославися. Радуйся, великомучениче и целителю Пантелеимоне.
Кондак 3
Силою Вышняго, дарованную тебе, и крепкие терпением твоим обезсилил еси мучителеву дерзость, мужественный победоносче: огня, зверей, колеса не убоявся и мечем усечен во главу, венец победы приял еси от Христа Бога, взывая Ему Аллилуиа.
Икос 3
Имущи обитель твоя вседрагую главу твою, богомудрый страстотерпче, яко превеликое сокровище, радости исполняется о сем и, любовию воспевающи данную тебе от Бога благодать исцелений, благодарно зовет ти: Радуйся, Никомидии светильниче всесветлый; радуйся, чтущей тя обители страже неусыпный. Радуйся, имже охладе безбожие; радуйся, имже возрасте богопознание. Радуйся, светлая страстотерпцев славо; радуйся, радостное православных слышание. Радуйся, исцелений благодатный источниче; радуйся, дарований великих вместилище. Радуйся, благовонное миро, облагоухающее души; радуйся, яко помогаеши призывающим тя. Радуйся, слепым зрение даровавый; радуйся, хромым благошествие устроивый. Радуйся, великомучениче и целителю Пантелеимоне.
Кондак 4
Бурею помышлений многобожия одержим, нечестивый царь смутися, увидев от завиствовавших тебе врачев, яко всякия неисцельныя недуги целиши ты Именем Христа. Мы же, с веселием славяще дивнаго в тебе Бога, вопием Ему: Аллилуиа.
Икос 4
Слышавше никомидийстии людие о великом сострадании твоем к страждущим и о безмездном врачевании от всяких болезней, устремишася вси к тебе, с верою во врачующую благодать, в тебе сущую, и приемлюще скорая исцеления от всяких болезней, прославляху Бога и тебе величаху, всемилостиваго целителя своего, зовуще ти: Радуйся, помазанный миром благодати; радуйся, храме Бога освященный. Радуйся, великая благочестивых славо; радуйся, твердая озлобляемых стено. Радуйся, мудрых превосходяяй разумом; радуйся, верных осияваяй мысли. Радуйся, Божественных даров приятелище и многообразных нам милостей Господних источниче; радуйся, скорый помощниче страждущим. Радуйся, обуреваемых пристанище; радуйся, заблуждших наставниче. Радуйся, болящих туне врачуяй; радуйся, обильно исцеления источаяй. Радуйся, великомучениче и целителю Пантелеимоне.
Кондак 5
Чудо преславное сотвори с тобою Господь, егда чрез служителя Своего Ермолая призва тя в чудный Свой свет. Ехидною бо велиею угрызенно умершее отроча по молитве твоей ко Христу абие оживе и воста здраво. Познав убо Жизнодавца всех Истиннаго Бога, с твердою верою воззвал еси Ему: Аллилуиа.
Икос 5
Узре свет слепый, емуже с призыванием Имене Христова прикоснулся еси ты, славне. Ермолаем бо пресвитером просвещен, отринув отеческое многобожие, восприял еси матернее благочестие, имже и отца просветил еси. Сего ради тебе, славному угоднику Божию и чудному врачу, взываем: Радуйся, к Богу велие рачение имеяй; радуйся, присногорящий огню Божественныя любве. Радуйся, деятельный послушателю священных поучений Ермолая; радуйся, последовавый советам матере твоея Еввулы. Радуйся, яко вся раздал еси, да Христа приобрящеши; радуйся, любовь к миру любовию Божиею победивый. Радуйся, яко вместо сладких мира за Христа лютая страдания приял еси; радуйся, яко общник сотворился еси Страстем Христовым. Радуйся, восторжествовавый над всеми страстьми; радуйся, украсивыйся благодатным безстрастием. Радуйся, исполняяй радости притекающия к тебе; радуйся, туне исцеляяй всех благодатию Христовою. Радуйся, великомучениче и целителю Пантелеимоне.
Кондак 6
Проповедник истины явися просвещенный тобою телесне и душевне слепец: подобно бо евангельскому слепцу, дерзновенно пред всеми исповеда Света Истиннаго Христа, просвещающа всякаго человека, нечестиваго же царя и боги языческия укорив, чрез мечное усечение взыде к немерцающему свету на Небеси пети Богу: Аллилуиа.
Икос 6
С светлым лицем представ судилищу цареву, дерзновенно взывал еси, преблаженне, во услышание всех: всецелебная сила моя и слава Христос есть Истинный Бог, Владыка всех, мертвыя воскрешаяй и всяк недуг отгоняяй. За таковое исповедание ублажающе тя, глаголем: Радуйся, уста громогласная Божества Христова; радуйся языче медоточный, вещаяй Его домостроительство. Радуйся, ветие превысшаго Богословия; радуйся, сеятелю мудрый благочестия. Радуйся, сладкозвучная веры свирель; радуйся, славный проповедниче Православия. Радуйся, прежде смерти явивый дивная; радуйся, по смерти совершаяй чудная. Радуйся, зрителю славы Христовой; радуйся, послушателю молящихся тебе. Радуйся, подателю милости тоя требующим; радуйся, ходатаю благ почитающим память твою. Радуйся, великомучениче и целителю Пантелеимоне.
Кондак 7
Миро излияся на душу твою, богомудрый целебниче, от Утешителя Духа; темже по смерти честныя останки твоя, благоуханием своим страстей злосмрадие отгоняя, исцеление подают вопиющим верою Богу: Аллилуиа.
Икос 7
Егда узреша идольстии чтители многолетна расслабленна, молитвою твоею, святе, воздвигнута и ходяща, мнози увероваша во Христа; жрецы же бесовстии, завистию снедаеми, подвигоша царя на ярость. Тебе убо нещадно за Христа стружему и опаляему бывшу, со умилением зовем: Радуйся, наслаждения земная презревый; радуйся, благ вещественных превысший. Радуйся, яко вся красная мира сего ни во что же вменил еси; радуйся, яко славу скоротекущую с себе отрясл еси. Радуйся, неуловим пребывый ловления Велиара; радуйся, победивый мучителя коварства. Радуйся, не пощадивый за Христа жизни своея; радуйся, враг явивыйся враждебныя плоти. Радуйся, многобожия широту утеснивый; радуйся, Божественною силою идолы поправый. Радуйся, острейшая стрело, язвящая враги; радуйся, предстателю, заступаяй верующия. Радуйся, великомучениче и целителю Пантелеимоне.
Кондак 8
Страннолепно являшеся тебе Господь, ободряя и соблюдая в мучениях за Имя Его: во образе бо пресвитера Ермолая, клокочущее олово, в неже ввержен был еси, охлади, и в мори отрешив велий камень от выи твоея, изведе неврежденна на землю. Ты же, паки представ пред царя, торжественно пел еси Христу Богу: Аллилуиа.
Икос 8
Весь умне на Небеси водворяяся, и низу на земли сущих не оставляеши, сопребывая с нами всечестною главою твоею, великий страстотерпче Христов, приемля от Господа и подая просвещение и освящение вопиющим тебе таковая: Радуйся, премудросте Божественныя исполненный; радуйся, промышления Божия о нас таинниче. Радуйся, богомудренных умов услаждение; радуйся, боголюбивых душ увеселение. Радуйся, пресветлый Христов бисере; радуйся, освященный душею и телом. Радуйся, во дворех перворожденных на Небеси вселивыйся; радуйся, в присноблаженных обитаяй чертозех. Радуйся, света Троическаго зрителю; радуйся, в молитвах к Богу теплый о нас предстателю. Радуйся, просвещение душам подаваяй; радуйся, скорбящим утешение ниспосылаяй. Радуйся, великомучениче и целителю Пантелеимоне.
Кондак 9
Всякое естество удивися, Пантелеимоне, сиянию в тебе благодати и богатству добродетелей: ангелоподобней чистоте твоей, великому мужеству в лютых страданиях, крепкой любве ко Христу и многому состраданию к людем, в нихже твориши преславная, во еже пети: Аллилуиа.
Икос 9
Ветия многовещанныя не возмогут по достоянию восхвалити борения твоя, славный добропобеднице, како непобедимою силою Божиею юный леты победи древняго и исконнаго врага и посрами идольскую прелесть. Мы же, удивления исполненнии, зовем ти: Радуйся, радостное зрелище Ангелов; радуйся, благоговейное удивление человеков. Радуйся, кровь за Христа излиявый и в смерти млеко источивый; радуйся, тело за Него мученической смерти предавый. Радуйся, исповедничества правило; радуйся, доблий воине Царя царей. Радуйся, тьмы державна победивый; Радуйся, победою твоею Небесных и земных обвеселивый. Радуйся, Горняго мира обитателю блаженный; радуйся, дольняго мира мудрый странниче. Радуйся, древо, украшенное плодами благодатных дарований; радуйся, носяй добропобедныя ветви. Радуйся, великомучениче и целителю Пантелеимоне.
Кондак 10
Сострадания исполнен, яко истинный подражатель Подателя милости Господа, честный страдальче, Пантелеимоном (си есть, всемилостивым) от Него проименован еси, на вся притекающия к тебе милость изливая, юже и нам неоскудно источай, о тебе вопиющим Богу: Аллилуиа.
Икос 10
Стену тя тверду обрет мучитель, никиими же муками победиму, покусися сокрушити крепость твою зубы зверей и остриями мучилищнаго колеса, обаче и в сем ничтоже успе: сила бо Христова лютость зверей укроти, а страшное коло, на немже обращаемо бе тело твое, абие сокрушися. Тебе убо непобедимому страстотерпцу зовем: Радуйся, честное Христово избрание; радуйся, непорочное Богови благоухание. Радуйся, твердый адаманте Церкве; радуйся, непоколебимый столпе, досязаяй до Небесе. Радуйся, звери видимыя укрощаяй; радуйся, драконов невидимых сокрушаяй. Радуйся, обагренный твоею за Христа кровию срастворенною млеком; радуйся, неувядаемыя приемый венцы. Радуйся, радость причинивый Ангелом и человеком; радуйся, прославленный Богом на Небеси и на земли. Радуйся, небожителю, ликовствуяй с мученики; радуйся, насыщаяйся лицезрением Христа пресладким. Радуйся, великомучениче и целителю Пантелеимоне.
Кондак 11
Песнь исходную приносим твоему за Христа заколению священному, в немже вместе с кровию млеко истече от тебе, великомучениче, и масличина, под неюже усечен был еси, исполнися целительных плодов. Темже Христу, дивно прославляющему славящия Его, тепле вопием: Аллилуиа.
Икос 11
Светозарная луча был еси, богомудре, во тьме многобожия седящим, путеводящая к Солнцу Правды Христу Богу, Емуже молися, во свете заповедей Его присно пребывати и нам, сицевая радостная тебе приносящим: Радуйся, пресветлая звездо, на мысленной тверди блистающая; радуйся, луча, христоименитым людем светящая. Радуйся, таинственно облиставаемый от Солнца Христа; радуйся, умне землю обтекаяй. Радуйся, селение красное Пресвятаго Духа; радуйся, сосуде пречестный, изливаяй исцеления. Радуйся, чистоты сокровище; радуйся, милости тезоимените. Радуйся, Царствия Небеснаго наследниче; радуйся, вечныя славы сопричастниче. Радуйся, предстателю бедствующим в мори житейстем; радуйся, безсребренниче, помогаяй призывающим тя с верою. Радуйся, великомучениче и целителю Пантелеимоне.
Кондак 12
Благодати обилие приял еси, треблаженне, по обилию любве твоея ко Христу Богу. Иже и яви тя многоцелебным источником, безмездно врачующим душевныя и телесныя болезни притекающих к тебе с верою и Богу вопиющих: Аллилуиа.
Икос 12
Поюще многострадальныя подвиги твоя за Христа, славный страстотерпче, хвалим долготерпение твое, ублажаем мученическую кончину, почитаем и священную память твою, заступниче наш и целителю, и в похвалу сицевая тебе зовем: Радуйся, благочестия трубо благозвучная; радуйся, мечу, посекаяй нечестие. Радуйся, строганный на древе за Распростершаго руце Свои на древе Крестнем; радуйся, яко опаляемь за Него, прелести пещь погасил еси. Радуйся, язвами твоими враги уязвивый; радуйся, кровию твоею токи идольския крове изсушивый. Радуйся, в кипящее олово вверженный за Христа; радуйся, погруженный за Имя Его в водах морских. Радуйся, промышлением Божиим неврежден в сих пребывый; радуйся, яко чрез огнь и воду мучения вшел еси в покой Небесный. Радуйся, изливаяй неизсякаемыя струи милости верным; радуйся, благосострадательный врачу, исцеления благодать подаваяй. Радуйся, великомучениче и целителю Пантелеимоне.
Кондак 13
О многострадальный и предивный страстотерпче Христов и целителю наш Пантелеимоне! Милостиво прием сие малое от нас приношение, от многообразных недугов исцели ны и предстательством твоим сохрани от враг видимых и невидимых и вечнаго мучения избавитися нам Господа умоли, да во Царствии Его выну воспеваем: Аллилуиа.
(Этот кондак читается трижды, затем икос 1 и кондак 1)
Молитвы великомученику и целителю Пантелеимону
Молитва первая
О великий Христов угодниче и преславный целебниче, великомучениче Пантелеимоне! Душею на Небеси Престолу Божию предстояй и триипостасныя Его славы наслаждаяйся, телом же и ликом святым на земли в Божественных храмех почиваяй и данною ти свыше благодатию различная чудеса источаяй, призри милостивным твоим оком на предстоящия люди, честней твоей иконе умильно молящияся и просящия от тебе целебныя помощи и заступления: простри ко Господу Богу нашему теплыя твоя молитвы и испроси душам нашим оставление согрешений. Се бо мы, за беззакония наша не смеюще возвести очеса наша к высоте небесней, ниже вознести глас молебный к Его в Божестве неприступней славе, сердцем сокрушенным и духом смиренным тебе, ходатая милостива ко Владыце и молитвенника за ны, грешныя, призываем, яко ты приял еси благодать от Него недуги отгоняти и страсти исцеляти. Тебе убо просим: не презри нас, недостойных, молящихся тебе и твоея помощи требующих. Буди нам в печалех утешитель, в недузех лютых страждующим врач, напаствуемым скорый покровитель, очесем недугующим прозрения датель, ссущим и младенцем в скорбех готовейший предстатель и исцелитель: исходатайствуй всем вся, яже ко спасению полезная, яко да твоими ко Господу Богу молитвами получивше благодать и милость, прославим всех благих Источника и Дароподателя Бога, Единаго в Троице Святей славимаго Отца и Сына и Святаго Духа ныне и присно и во веки веков. Аминь.
Молитва вторая
О преславный мучениче и доблий воине Небеснаго Царя, Пантелеимоне всеблаженне, милостиваго Бога преизрядный подражателю, иже Христа на земли дерзновенно исповедав, и многообразныя за Него муки претерпев, неувядаемый приял еси венец на Небеси, идеже вечнаго наслаждаешися блаженства, и со дерзновением Престолу трисолнечнаго Божества предстоиши! К твоему христоподражательному состраданию по Бозе прибегаем вси мы грешнии, и всеусердно молим тя, теплаго заступника и предстателя нашего: не престай призирати на нас, сущих в нуждах и скорбных обстояниях, и твоею молитвенною помощию и цельбоподательною силою избавляй нас присно от лютых зол, всегубительства и всякия иные беды и болезни. Ты бо приял еси, святе, неоскудную благодать исцелений от Спаса нашего Иисуса Христа за твердую твою к Нему веру, при чистом и непорочном житии, запечатленную мученичеством и многопобедною твоею кончиною, в нейже по данней ти благодати и наименован от Христа Пантелеимоном, милости тезоименитым, милующим всех притекающих к тебе в скорбех и болезнех. Сего ради ведуще тя милостиваго во всем помощника и целителя, с верою взываем к тебе: услыши нас и богоприятным ходатайством твоим подавай нам вся благопотребная в житии сем и нужная к вечному спасению. Мученическим же дерзновением твоим умоли милостиваго Бога, да помилует нас грешных и недостойных по велицей милости Своей, да избавит от труса, потопа, огня, меча и всякаго праведнаго гнева и прещения, благовременне подвизая нас к очистительному и умилостивительному во гресех наших покаянию, ради множества щедрот Своих, да подаст всем нам безбедное, тихое и богоугодное житие, православным же на вся враги победу и одоление, и всех нас от враг видимых и невидимых да сохранит благодатию Своею и непобедимым ополчением Ангел Своих, имиже ограждаеми и наставляеми да поживем в веце сем в покаянии, чистоте и в творении богоугодных дел; да сподобимся твоим теплым предстательством христианскую кончину улучити безболезненну, мирну, непостыдну, избавитися от козней воздушных князей тьмы и от вечныя муки, и быти наследниками безконечнаго, всеблаженнаго Царствия. Ей, угодниче Божий! Не престай молитися за ны грешныя, да твоим ходатайством временных и вечных бед избавлени, величаем тебе, заступника нашего и молитвенника, и вечно прославляем общаго Владыку и Господа нашего Иисуса Христа, Емуже подобает всякая слава, честь и поклонение со Безначальным Его Отцем и Пресвятым Духом, ныне и присно и во веки веков. Аминь.
Молитва третья преосвященного Иеремии (Отшельника)
Святый великомучениче и целебниче Пантелеимоне! Моли Бога о нас и не допусти долее оставаться в нас тем болезням, коими болим душею и телом! Исцели те язвы и струпы кои причинены нам страстями нашими. Болим мы леностию и расслаблением — исцели ны. Болим влечением и пристрастием к земным предметам — исцели ны. Болим, о святый Пантелеимоне! Болим забывчивостию: о деле спасения, о наших грехах и немощах, о наших обязанностях — исцели ны. Болим злопомнением, гневливостию, ненавистничеством — исцели, о целебниче Свято-Афонский и всемирный. Болим завистью, гордостью, надменностью, превозношением, при всей скудости и непотребстве — исцели ны. Болим многими и разными припадками плотоугодия: чревоизлишеством, невоздержностию, многоядением, сластолюбием — исцели ны. Болим сонливостью, многословием, празднословием, осудливостью — исцели ны, о святый Пантелеимоне! Болят наши очи греховными воззрениями, болят наши уши слушанием пустословия, злоречия, наветов — исцели ны. Болят руки нерасположением к молитвенному воздеянию и к подаянию милостыни — исцели ны. Болят наши ноги нежеланием поспешно идти в храм Господень и стремлением к хождениям по стогнам и к посещениям домов мирских — исцели ны. Болит, зело болит язык наш, уста наши: пустословием, празднословием, злоречием, отвращаясь от молитвословий и славословий, или произнося их небрежно, рассеянно, без внимания, без понятия — исцели ны, о милостиве! От главы до ног болим мы: болит в нас разум непонятливостию, неразумностию и безумием; болит в нас воля, отвращаясь от святых занятий и стремясь к делам вредным и богопротивным; болит в нас память, забывая наши прегрешения и содержа в себе неутратно согрешения и оскорбления ближних наших; болит в нас воображение, не умея и не желая живо представить нам нашу смерть, вечную муку грешных, блага Царствия Небесного, Божий гнев, крестные страдания Христовы, Его распятие — исцели ны, о святый Пантелеимоне! Все в нас болит. Немощствует и душа наша вся со всеми ее силами и способностями. Немощствует и тело наше все со всеми его членами. Исцели ны, о святый Пантелеимоне, Целебниче безмездный и любвеобильный Врачеватель, слуга Пресвятая Богородицы, и не оставь наше окаянство в толицех недугах и в толицей немощи: да исцелись твоею благодатию, прославлю Пресвятую Троицу, Отца и Сына и Святаго Духа и Пресвятую Богородицу, тебе на служение болящим посылающую, и возблагодарю твою, о святый Пантелеимоне, цельбоносную святыню во веки. Аминь.
Молитва четвертая
О великий угодниче Христов, страстотерпче и врачу многомилостивый, Пантелеимоне! Умилосердися надо мною, грешным рабом, услыши стенание и вопль мой, умилостиви небеснаго, верховнаго Врача душ и телес наших, Христа Бога нашего, да дарует ми исцеление от гнетущаго мя недуга. Приими недостойное моление грешнейшаго паче всех человек. Посети мя благодатным посещением. Не возгнушайся греховных язв моих, помажи елеем милости твоея и исцели мя: да, здрав сый душею и телом, остаток дний моих, благодатию Божиею, возмогу провести в покаянии и угождении Богу и сподоблюся восприяти благий конец живота моего. Ей, угодниче Божий! Умоли Христа Бога, да предстательством твоим дарует ми здравие телу и спасение души моей. Аминь.
Молитва пятая (благодарственная, после исцеления от болезни)
Святый великомучениче, целителю и чудотворче Пантелеимоне, всеизрядный угодниче Божий и молитвенниче присный христиан православных! Достойно наречен еси Пантелеимоном, еже есть всемилостивый, яко, прияв от Бога благодать молитися за ны и болезни целити, ты богатно подаеши всем, к тебе притекающим, различная исцеления и вся к жизни временней и ко спасению потребная: сего ради и мы недостойнии, сподобившеся твоея милости, паки пред святою твоею иконою прибегаем к тебе, и прославляюще тя, яко искренняго угодника Божия, нашего же вернаго молитвенника и исцелителя, усердне благодарим тя и подателя всех благ Господа Бога нашего о великих благодеяниих, от Него тобою нам бывших. Приими убо милостивно малое сие молитвенное благодарение наше, зане не имамы ино что по достоянию воздати тебе, и прочее время живота нашего не лиши нас, немощных и грешных, твоея помощи и молитвеннаго ходатайства у Господа Бога нашего, Емуже подобает всякая слава, благодарение и поклонение, Отцу и Сыну и Святому духу, ныне и присно и во веки веков. Аминь.
Молитва шестая
Святый великомучениче и целителю Пантелеимоне, Бога милостиваго подражателю! Призри благосердием и услыши нас, грешных, пред святою твоей иконою усердне молящихся. Испроси нам у Господа Бога, Ему же со Ангелы предстоиши на небеси, оставление грехов и прегрешений наших. Исцели болезни душевныя же и телесныя рабов Божиих, ныне поминаемых, зде предстоящих и всех христиан православных, к твоему заступлению притекающих. Се бо мы, по грехом нашим люте одержимы есмы многими недуги и не имамы помощи и утешения, к тебе же прибегаем, яко дадеся ти благодать молитися за ны и целити всяк недуг и всяку болезнь. Даруй убо всем нам святыми молитвами твоими здравие и благомощие души и тела, преспеяние веры и благочестия и вся к житию временному и ко спасению потребная. Яко да, сподобившися тобою великих и богатых милостей, прославим тя и подателя всех благ, дивнаго во святых, Бога нашего, Отца, и Сына, и Святаго Духа. Аминь. Тропарь великомученику и целителю Пантелеимону
Тропарь, глас 3
Страстотерпче святый и целебниче Пантелеимоне, моли Милостивого Бога, да прегрешений оставление подаст душам нашим.
Кондак, глас 5
Подражатель сый Милостиваго, и исцелений благодать от Него прием, страстотерпче и мучениче Христа Бога, молитвами твоими душевныя наша недуги исцели, отгоня присно борца соблазны от вопиющих верно: спаси ны, Господи.
Величание
Величаем тя, страстотерпече святый великомучениче и целебниче Пантелеимоне, и чтим честная страдания твоя, яже за Христа претерпел еси.
Акафист Пресвятой Богородице пред иконой «Всецарица»
This gallery contains 1 photo.
АКАФИСТ ПРЕСВЯТЕЙ БОГОРОДИЦЕ В ЧЕСТЬ ИКОНЫ ЕЯ «ВСЕЦАРИЦА»
Кондак 1
Новоявленней Твоей иконе предстояще вернии, умильно воспеваем Ти, Всецарице, раби Твои; низпосли цельбы к Тебе притекающим ныне рабом Твоим, да вси радостно зовем Ти:
Радуйся, Всецарице, недуги наша благодатию исцеляющая.
Икос 1
Ангел предстатель с Небесе сшед, рече Всецарице: радуйся! И боговещанным гласом, воплощаема Тя зря, Господи, возопи к Ней таковая:
Радуйся, главизно нашего спасения; радуйся, исполнение Зиждителева смотрения.
Радуйся, яко Тобою Бог воплотися; радуйся, яко Невидимый в Тебе изобразися.
Радуйся, Милость мира внутрь приявшая; радуйся, одеяние плоти Слову соткавшая.
Радуйся, уму непостижная горняя славо; радуйся, сердца оживившая небесная манно.
Радуйся, звездо, благодати сияние; радуйся, источниче, живыя воды излияние.
Радуйся, Богородице, в женах благословенная; радуйся, рождшая Спаса Дево нетленная.
Радуйся, Всецарице, недуги наша благодатию исцеляющая.
Кондак 2
Безначальное Слово Отроча младо Тобою бысть, исцеления подая Тя, Дево, чтущим и неизреченное Его Рождество воспевающим: Аллилуиа.
Икос 2
Разум недоразумеваемый разумети Дева ищущи, возопи к служащему: яко Отроковица чистая, како буду Вышняго Мати, изъясни. К Ней же Гавриил рече со страхом, зовый таковая:
Радуйся, совета Вышняго Избраннице; радуйся, гласа молящихся Скоропослушнице.
Радуйся, сокровище Христова мира; радуйся, людей Твоих надеждо и сило.
Радуйся, раковыя язвы дивная губительнице; радуйся, прочих болезней Исцелительнице.
Радуйся, единое миру заступление; радуйся, верное в скорбех избавление.
Радуйся, плач и слезы присно утоляющая; радуйся, спасения входы всем отверзающая.
Радуйся, скиптре и державо Афон населяющих; радуйся, жезле монахов и мирян.
Радуйся, Всецарице, недуги наша благодатию исцеляющая.
Кондак 3
Сила Вышняго осени Тя, Отроковице, плоть прият неизреченно, показа Тя село сладкое хотящим жати спасение и поющим: Аллилуиа.
Икос 3
Прославися дивно святая икона Твоя, Всецарица именуемая, егда цельбоносно явися Богоматере изображение; вопиющим же пред нею с верою исцеления подаеши, да умножаются песни сицевыя:
Радуйся, Мати незаходимаго Света; радуйся, претерпевших до конца победо.
Радуйся, в болезнех и скорбех сущим врачевание; радуйся, сирот и вдовиц нерушимая стено.
Радуйся, двери райския отверзающая; радуйся, труждающихся и обремененных заступающая.
Радуйся, о спасении верных Ходатаице; радуйся, за род человеческий Молитвеннице.
Радуйся, лествице небесная, возводящая от земли к Небеси; радуйся, водо живая, омывающая смертные грехи.
Радуйся, Агнице, сердца незлобивых хранящая; радуйся, Покрове, чад Церкви осеняющий.
Радуйся, Всецарице, недуги наша благодатию исцеляющая.
Кондак 4
Живот мирови даруя, Владыка мира вселися во утробу Твою неискусомужно и, Матерь верных Тя показав, в мире тех воспевати призва: Аллилуиа.
Икос 4
Преславная содеяшася о Тебе, Граде Божий, исцелением бывающим от святыя иконы Твоея; цельбоносныя струи врачеваний приемлюще, благодарственно, о Всецарице, вопием:
Радуйся, снадобие, боль утоляющее; радуйся, прохладо, жар недужный остужающая.
Радуйся, прижигающая раковыя язвы, аки пламенем; радуйся, подымающая со одра оставленных врачми.
Радуйся, лик Свой пречистый избранным являющая; радуйся, от греховных уз разрешающая.
Радуйся, яко Тобою избавление от смерти даровася; радуйся, яко Тобою неисчетный сонм верных оправдася.
Радуйся, высото, человеческими помыслы неизследованная; радуйся, глубино, единым Словом изведанная.
Радуйся, пророчествие прежде Тебе бывших патриархов; радуйся, наставнице Тебе молившихся иерархов.
Радуйся, Всецарице, недуги наша благодатию исцеляющая.
Кондак 5
Пречистый Храм Спасов познахом Тя, Отроковице; к Тебе припадаем, Чистая, да нас соделаеши храмы Божества, вопиющих Ему : Аллилуиа.
Икос 5
Видеша чини Ангельстии на руку Твоею Создавшаго рукою человеки и, яко Владычицу разумевающе Тя едину, аще и рабою Себе нарекла еси, потщашася песньми послужити Ти, Благословенней, сицевыми:
Радуйся, Богом поставленная превыше небесных Сил; радуйся, чудесными исцеленьми исполняющая мир.
Радуйся, хвалу и славу от Небес слышащая; радуйся, благодарение от земли приемлющая.
Радуйся, яко семя тли в сердцах потребила еси; радуйся, яко козней диавольских ярем сокрушила еси.
Радуйся, юдоль плачевную исполнившая радостию; радуйся, скорби изменяющая в небесную сладость.
Радуйся, благоухание Богу приятное; радуйся, кающихся грешников веселие изрядное.
Радуйся, броне правды от искушений; радуйся, щите ограждения от вражды и нестроений.
Радуйся, Всецарице, недуги наша благодатию исцеляющая.
Кондак 6
Проповедницы богоглаголивии, Спасовы ученицы, предсташа Ти, Дево, чудно, внегда от земли к Небеси восходила еси, да единым сердцем и усты воспоют Богови: Аллилуиа.
Икос 6
Возсия дивная благодать от иконы Твоея, Всецарице, егда юноша, ученьми сатанинскими омраченный, пред нею паде и недвижим бысть; паче чаяния же от уз мрачных свобожденный, со страхом и радостию взываше Ти сице:
Радуйся, исправление нечестиваго жития; радуйся, утешение страждущих люте.
Радуйся, бесовских полчищ от Церкве отгнание; радуйся, мглы греховныя разсеяние.
Радуйся, козней невидимых упразднение; радуйся, демонских чар всемощное одоление.
Радуйся, светильниче, прельщенных наставляяй; радуйся, облаче, невинных от зла покрываяй.
Радуйся, холме, небесною манною питающий; радуйся, долино, смирением Христовым насыщающая.
Радуйся, каменю Небеснаго Царствия; радуйся, зерцало превечнаго Света.
Радуйся, Всецарице, недуги наша благодатию исцеляющая.
Кондак 7
Хотящу дати Себе в снедь верным, благоволил еси от Девы воплотитися, да приемлюще Пречистое Тело и Кровь Твою, познают Тя, Бога совершеннаго; темже, дивящеся неизреченней премудрости сей, зовем: Аллилуиа.
Икос 7
Новое показа таинство явлься Зиждитель, со ученики совершивый Тайную Свою Вечерю; мы же, моляще Всецарицу удостоити нас Божественныя Святыни, восписуем Ей сицевая:
Радуйся, Подательнице Небеснаго Хлеба; радуйся, Родительнице Вечнаго Живота.
Радуйся, чаше, Христу приобщающая; радуйся, душу и тело с Богом сочетающая.
Радуйся, лжице златая, исполнь Божественных Таин; радуйся, кивоте драгий, вместилище великия Святыни.
Радуйся, персте, на святую Евхаристию указуяй; радуйся, Трапезо, предлагающая нам Пищу Святую.
Радуйся, в час судный достойных причастников одесную поставляющая; радуйся, ревнителей Божественныя Литургии от ада избавляющая.
Радуйся, приводящая смертных к Источнику безсмертия; радуйся, ограждающая чад Своих миром и крепостию.
Радуйся, Всецарице, недуги наша благодатию исцеляющая.
Кондак 8
Странное Рождество видевше, житейское всякое отложим попечение и горе имеем сердца; на сие бо Вышний явися, во еже привлещи к высоте Тому вопиющия: Аллилуиа.
Икос 8
Неотступно в недрах Отеческих пребывая, Слово неописанное на земли плоть бысть; Бог Велий сотвори величие Деве и призре на смирение Рабы Своея, слышащия сицевая:
Радуйся, невместимаго Бога вместившая; радуйся, надмирнаго Творца миру явившая.
Радуйся, яко сокрушися смерти держава; радуйся, яко исцелися Адамова рана.
Радуйся, пластырю, струпы душевныя заживляяй; радуйся, елее, язвы телесныя умащаяй.
Радуйся, утоление болезней рождающих; радуйся, облегчение мук умирающих.
Радуйся, нанесшая поражение аду; радуйся, притупившая смерти жало.
Радуйся, чаяние всеобщаго воскресения; радуйся, православных несумненное спасение.
Радуйся, Всецарице, недуги наша благодатию исцеляющая.
Кондак 9
Всякое естество ангельское и человеческое удивися величию непостижимаго Твоего воплощения, Слове; недоумевающе же о сей велией тайне благочестия, со страхом и трепетом благодарственно зовем Ти: Аллилуиа.
Икос 9
Многоразличными недуги одержимии, о Всецарице, от святыя иконы Твоея паче чаяния исцеления получают, да приимше верою благодать, велегласно вопиют Ти:
Радуйся, здравых чад присное сохранение; радуйся, болящих ко здравию преложение.
Радуйся, детей недугующих исцеление; радуйся, юных страдальцев Мати.
Радуйся, возстание на одр болезни поверженных; радуйся, отрадо страхом смертным одержимых.
Радуйся, яко внемлеши человеков рыданием; радуйся, призревающая на наша стенания.
Радуйся, болей земных небесною радостию растворение; радуйся, люте обуреваемых пачеестественное терпение.
Радуйся, яко уготовляеши плачущим радость; радуйся, яко снабдеваеши кротких крилома молитвы.
Радуйся, Всецарице, недуги наша благодатию исцеляющая.
Кондак 10
Спасти хотя Зиждитель истлевшее грехом человеческое естество, сниде на Тя, яко дождь на руно, и, купину Тя соделав неопалимую, Бог сый, бысть Человек, да воспеваем Ему: Аллилуиа.
Икос 10
Стена еси девам, Отроковице Чистая, и всем о чистоте радящим, в Тя бо вселися Бог, очищаяй разумная создания Своя, да избывше всякия скверны, предлагаем Ти сицевая:
Радуйся, молчания взыскующих Собеседнице; радуйся, венче хранящих девство.
Радуйся, начало и конец духовнаго совершения; радуйся, хранилище Божественнаго откровения.
Радуйся, Троическаго Совета Таиннице; радуйся, спасения человеков виновнице.
Радуйся, вершино, гордым умом неприступная; радуйся, убежище, смиренным сердцам доступное.
Радуйся, Чистая, Небесе чистейшая; радуйся, Херувимов и Серафимов честнейшая.
Радуйся, Обрадованная, яко прияла еси от Архангела радование; радуйся, Утешенная, яко руце Твои осязасте воскресшаго Христа.
Радуйся, Всецарице, недуги наша благодатию исцеляющая.
Кондак 11
Пение тщащеся разумное Спасу приносити, всегда неключими, Владычице, остаемся раби Твои; кто бо может достойно воспети Бога, Егоже имя, яко миро излиянное? Сего ради вопием Ему: Аллилуиа.
Икос 11
Свет велий возсияв во тьме седящим, посети нас, о Дево, Восток свыше Сын и Бог Твой; Тя соделав свещею на свещнице, светоносным чадом церковным наказует приносити Ти сицевая:
Радуйся, заре умнаго Солнца; радуйся, вместилище Божественнаго Огня.
Радуйся, свете, яко одеяние святых соткала еси; радуйся, свеще, яко тьму бесовскую отгнала еси.
Радуйся, косных умов просвещение; радуйся, грешных сердец озарение.
Радуйся, деснице, из моря суетствий изводящая; радуйся, лучу, путеводяй к Царствию спасающихся.
Радуйся, молние, нераскаянных поражающая; радуйся, громе, губителей устрашающий.
Радуйся, лукавыя совести просветление; радуйся, умилостивление Божия Суда.
Радуйся, Всецарице, недуги наша благодатию исцеляющая.
Кондак 12
Благодать дати восхотев, завета ветхаго Податель завет новый нам дарова; мы же, благодать сию приимше, не делы закона, но единою верою спасение улучивше, восписуем вси: Аллилуиа.
Икос 12
Поюще Твое рождество, якоже древле Израиль в кимвалех сеновную скинию воспеваше, тако мы ныне Тя, Скинию истинну, добродетельми прославляем, да слышиши от всех сицевая:
Радуйся, песне, воспеваемая горе; радуйся, псалме, слышимый низу.
Радуйся, Единому Богу достойно послужившая; радуйся, Божественней Троице смирением угодившая.
Радуйся, веки Носящаго носившая в Себе; радуйся, престоле Содержащаго вселенную в руце.
Радуйся, тайно неизреченная веков и времен; радуйся, упование твердое народов и племен.
Радуйся, сердечное радование иереев благоговейных; радуйся, быстрое слышание молитв церковных и келейных.
Радуйся, Премудрости доме богозданный; радуйся, милости сосуде, Богом избранный.
Радуйся, Всецарице, недуги наша благодатию исцеляющая.
Кондак 13
О Всецарице Мати, рождшая всех святых Святейшее Слово, нынешнее наше приемши песнопение, от всякия смертныя болезни исцели ны и будущаго избави осуждения вопиющих: Аллилуиа.
Этот кондак читается трижды, затем 1-й икос «Ангел предстатель…» и 1-й кондак «Новоявленней Твоей…».
Молитва первая
О Всеблагая досточудная Богородице Пантанасса, Всецарице! Несмь достоин, да внидеши под кров мой! Но яко милостиваго Бога любоблагоутробная Мати, рцы слово, да исцелится душа моя и укрепится немощствующее тело мое. Имаши бо державу непобедимую и не изнеможет у Тебе всяк глагол, о Всецарице! Ты за мя упроси, Ты за мя умоли, да прославляю преславное имя Твое всегда, ныне и в безконечныя веки. Аминь.
Молитва вторая
О Пречистая Богомати, Всецарице! Услыши многоболезненное воздыхание наше пред чудотворною иконою Твоею, из удела Афонскаго в Россию пренесенною, призри на чад Твоих, неисцельными недуги страждущих и ко святому образу Твоему с верою припадающих! Якоже птица крилома покрывает птенцы своя, тако и Ты ныне, присно жива сущи, покрый нас многоцелебным Твоим омофором. Тамо, идеже надежда исчезает, несумненною надеждою буди. Тамо, идеже лютыя скорби превозмогают, терпением и ослабою явися. Тамо, идеже мрак отчаяния в души вселися, да возсияет неизреченный свет Божества! Малодушныя утеши, немощныя укрепи, ожесточенным сердцам умягчение и просвещение даруй. Исцели болящия люди Твоя, о всемилостивая Царице! Ум и руки врачующих нас благослови, да послужат орудием всемощнаго Врача Христа Спаса нашего. Яко живей Ти сущей с нами, молимся пред иконою Твоею, о Владычице! Простри руце Твои, исполненныя исцеления и врачбы, Радосте скорбящих, в печалех Утешение, да, чудотворную помощь скоро получив, прославляем Живоначальную и Нераздельную Троицу, Отца, и Сына, и Святаго Духа во веки веков. Аминь.
Тропарь, глас 4
Образом радостотворным честныя Всецарицы, желанием теплым взыскающих благодати Твоея спаси, Владычице, избави от обстояний к Тебе прибегающих, от всякия напасти огради стадо Твое, к заступлению Твоему взывающее присно.
Акафист святителю Луке Войно-Ясенецкому
This gallery contains 1 photo.
Акафист святителю Луке Крымскому (Войно-Ясенецкому)
Кондак 1
Возбранный святителю Церкве Православныя и исповедниче, возсиявый стране нашей в земли Крымстей, яко светозарное светило, добре потрудивыйся и за имя Христово гонение претерпевый, прославляюще прославльшаго тя Господа, даровавшаго нам тебе новаго молитвенника и помощника, похвальное воспеваем ти пение; ты же, яко имеяй велие дерзновение ко Владыце небесе и земли, от всяких недугов душевных и телесных свободи нас и добре стояти во Православии укрепи, да вси во умилении зовем ти: Радуйся, святителю Крымский, исповедниче Луко, врачу благий и милостивый.
Икос 1
Ангелов собеседниче и человеков наставниче, Луко преславный, подобне евангелисту и Апостолу Луке, емуже тезоименит сый, от Бога дар целити недуги человеческия приял еси, во врачевании болезней ближних многия труды подъемля, и, плоть нося, о плоти нерадел еси, делы добрыми Отца Небеснаго прославил еси. Темже благодарне во умилении зовем ти:
Радуйся, от юности разум свой игу Христову покоривый.
Радуйся, пречестное Святыя Троицы селение бывый.
Радуйся, блаженство милостивых, по слову Господа, унаследовавый.
Радуйся, верою Христовою и знанием богодарованным многия недужныя исцеливый.
Радуйся, страждущих недуги телесными врачу милосердный.
Радуйся, во дни брани вождей и воинов исцелителю.
Радуйся, всех врачев наставниче.
Радуйся, скорый в нуждах и скорбех сущим помощниче.
Радуйся, Церкве Православныя утверждение.
Радуйся, земли нашея озарение.
Радуйся, крымския паствы похвало.
Радуйся, града Симферополя украшение.
Радуйся, святителю Крымский, исповедниче Луко, врачу благий и милостивый.
Кондак 2
Видя в человецех во время врачеваний, аки в зерцале, премудрость и славу Творца всяческих Бога, к Нему духом выну возносился ecи, богомудре; светом же богоразумия твоего и нас озари, да вопием купно с тобою: Аллилуиа.
Икос 2
Разум твой Божественными ученьми просветил еси, Луко всеславне, отвергнув всякое плотское мудрование, с разумом же и волю повинул еси Господеви, подобен апостолом быв. Тии бо по слову Христову: «Грядита по Мне, и сотворю вы ловца человеком», — оставиша вся и по Нем идоша, и ты, святе, услышав Господа Иисуса, зовущаго тя на служение чрез раба Своего архиепископа Ташкентскаго Иннокентия, абие приемлеши священство в Церкви Православней. Сего ради, яко богомудраго наставника, тя ублажающе, воспеваем сице:
Радуйся, Ангела Хранителя увеселение.
Радуйся, яко николиже того опечалил еси.
Радуйся, во учении преспевавый и мудрецы мира сего удививый.
Радуйся, от творящих беззаконие уклонивыйся.
Радуйся, Божия Премудрости созерцателю и проповедниче.
Радуйся, истиннаго богословия златословесный учителю.
Радуйся, апостольских преданий блюстителю.
Радуйся, свеще, Богом возженная, мрак нечестия разгоняющая.
Радуйся, звездо, путь ко спасению показующая.
Радуйся, Православия ревнителю.
Радуйся, раскольников обличителю.
Радуйся, свидений и оправданий Господних возжадавый.
Радуйся, святителю Крымский, исповедниче Луко, врачу благий и милостивый.
Кондак 3
Силою благодати Божия, еще во временней жизни приял еси дар, святе Луко, недуги целити, да вси, усердно притекающии к тебе, исцеления недугов телесных и паче душевных сподобляются, вопиюще Богу: Аллилуиа.
Икос 3
Имея неусыпное попечение о спасении душ, вверенных тебе от Бога, Луко блаженне, пастырски к душеспасительной жизни и словом, и самым делом непрестанно наставлял еси. Сего ради приими от нашего усердия похвалы, достойно тебе приносимыя:
Радуйся, Божия разума исполненный.
Радуйся, благодатию Духа Святаго приосененный.
Радуйся, нищеты Христовы подражателю.
Радуйся, пастырю добрый, уклоняющихся от веры православныя и блуждающих по горам суемудрия взыскавый.
Радуйся, делателю винограда Христова, чад Божиих укрепляяй в истинней вере православней.
Радуйся, щите, защищаяй благочестие.
Радуйся, непоколебимое Православия основание.
Радуйся, твердый каменю веры.
Радуйся, душепагубнаго неверия и злотворнаго обновленчества обличителю и искоренителю.
Радуйся, в делании духовнем подвизающихся мудрый укрепителю.
Радуйся, от мира изгнанным пристанища тихаго указателю.
Радуйся, яко приим крест, Христу последовал еси.
Радуйся, святителю Крымский, исповедниче Луко, врачу благий и милостивый.
Кондак 4
Бурю внутрь имея помышлений многих, недоумеваше раб Божий, что речет о нем Господь, егда проразумеваху его достойна быти епископом граду Ташкенту, обаче всего себе Христу Богу предав, Тому о всем благодарение возсылаше, зовый: «Благословен Бог, изливаяй благодать Свою на архиереи Своя», — и поя Ему: Аллилуиа.
Икос 4
Слышавше людие православнии, в гонении сущии, о благоплодных добротах души твоея, богоносе Луко, и видевше тя на степени святительства, яко достойный сосуд Божественныя благодати, вся немощная врачующия и оскудевающая восполняющия, дивляхуся чудному промышлению Бога о тебе и приношаху ти благохваления сицевая:
Радуйся, архиерею, от Самаго Господа пронареченный.
Радуйся, о надписании сана епископскаго на книзе твоей предуказание мысленное приявый.
Радуйся, иерархов украшение.
Радуйся, пастырю, иже готов бысть душу положити за овцы своя словесныя.
Радуйся, многосветлый Церкве светильниче.
Радуйся, Апостолов сопричастниче.
Радуйся, исповедников украшение.
Радуйся, всякое о себе попечение отвергнувый.
Радуйся, скорбей утолителю.
Радуйся, о людских невежествиих печальниче.
Радуйся, искавших спасения правым учением оглашавый.
Радуйся, житием твоим сего учения не посрамивый.
Радуйся, святителю Крымский, исповедниче Луко, врачу благий и милостивый.
Кондак 5
Боготочною Кровию от вечныя смерти искупленныя соблюдая, егда сан епископа в дни страшных гонений по благословению святаго Патриарха Тихона от рук епископов православных приял еси, святителю Луко, дело благовестника добре сотворил еси, обличая, запрещая, умоляя со всяким долготерпением и учением и поя Богу: Аллилуиа.
Икос 5
Видевше Ангельстии чинове великия подвиги твоя, егда по заповеди Господней: «Блажени изгнани правды ради, яко тех есть Царствие Небесное», — в крепости сердечней безропотно понесл еси заточение и изгнание в Сибирь за имя Господа и Святую Церковь Христову, терпением велиим устрояя спасение свое, примером же своим верных души назидая, — удивишася. Мы же тя, усердно любовию почитающе, чествуем похвалами сими:
Радуйся, светильниче, на свещнице церковнем поставленный.
Радуйся, яко слово Писания: «Любы долготерпит», — на тебе оправдася.
Радуйся, защищати тя верным воспретивый.
Радуйся, властем повинувыйся и сего ради волею в руки воинов нощию предавыйся.
Радуйся, клевреты неправедных судей уничиженный.
Радуйся, в заточение со смирением безропотно шедый.
Радуйся, от паствы твоея Ташкентския правды ради изганный.
Радуйся, яко вернии о разлучении с тобою рыдаху.
Радуйся, за Господа распятаго изъязвленный и заушенный.
Радуйся, уста лживых неверов заградивый.
Радуйся, праведными усты твоими небесныя истины и во изгнании вещавый.
Радуйся, яко мученицы на небесех о терпении твоем ликовствоваху.
Радуйся, святителю Крымский, исповедниче Луко, врачу благий и милостивый.
Кондак 6
Проповедник немолчный тайны Пресвятыя, Единосущныя и Неразделимыя Троицы был ecи и в темнице, и во градех изгнания сибирскаго, терпя глад, мраз страны северныя и жестокость клевретов безбожных. Сего ради проповедует Церковь Крымская величия Божия, явленная на тебе, святителю Луко, яко целил еси силою Божиею недуги душевныя и телесныя и в стране изгнания, да вси единем сердцем и единеми усты воспеваем Богу: Аллилуиа.
Икос 6
Возсиял еси, яко звезда лучезарная, красноярстей пастве и тамбовстей, озаряя души верных и разгоняя тьму нечестия и безбожия. И исполнишася на тебе слова Христовы: «Блажени есте, егда поносят вам, и ижденут, и рекут всяк зол глагол на вы, лжуще, Мене ради». Ты бо, гонимый из града во град и клеветы терпевый, архипастырское служение усердне исполнял еси и сладостию писаний твоих вся алчущия и жаждущия правды насыщал еси, иже благодарне взывают тебе:
Радуйся, наставниче, всех к небеси путеводяй.
Радуйся, славы Божией истинный ревнителю.
Радуйся, воине Христов непобедимый.
Радуйся, за Христа Господа темницы и биения терпевый.
Радуйся, смирения Его истинный подражателю.
Радуйся, вместилище Духа Святаго.
Радуйся, вшедый с мудрыми в радость Господа твоего.
Радуйся, корыстолюбия обличителю.
Радуйся, пагубу тщеславия показавый.
Радуйся, беззаконники ко обращению призывавый.
Радуйся, имже Христос прославися.
Радуйся, имже сатана посрамися.
Радуйся, святителю Крымский, исповедниче Луко, врачу благий и милостивый.
Кондак 7
Хотя достойно совершити подвиг, от Бога на тя возложенный, облеклся еси во вся оружия Божия и стал еси на брань противу миродержителей века сего, духов злобы поднебесных, препоясав чресла своя истиною и облекся в броню правды, угасил еси, исповедниче Луко, вся стрелы лукаваго, поя Содетелю и Богу: Аллилуиа.
Икос 7
Новое гонение воздвигоша беззаконнии и безбожнии человецы на Церковь Православную и во глубину дальней таежной страны услаша тя, святителю Луко, и близ смерти быв, рукою Божиею сохранен, взывал еси со Апостолом Павлом: «До нынешняго часа и алчем, и жаждем, и наготуем, и страждем, и скитаемся. Гоними, терпим; якоже отребие миру быхом, всем попрание доселе». Сего ради, ведуще о тебе таковая, ублажаем тя:
Радуйся, исповедниче Христов блаженный.
Радуйся, мраз лютый и глад во изгнании претерпевый.
Радуйся, близ смерти бывый, Господом сохраненный.
Радуйся, самоотвержение всецелое показавый.
Радуйся, уневестивый душу твою Жениху Христу.
Радуйся, Господа, распятаго на Кресте, присно пред собою предзревый.
Радуйся, яко во бдениих и молитвах неослабно пребывал еси.
Радуйся, Единосущныя Троицы истинный ревнителю.
Радуйся, от всякия болезни скорый и безмездный врачу.
Радуйся, ломотныя и опухлыя уврачевавый.
Радуйся, от неисцельныя гнойныя болезни костей и ран здравых возставивый.
Радуйся, яко верою твоею и труды врачебными расслабленнии исцелеша.
Радуйся, святителю Крымский, исповедниче Луко, врачу благий и милостивый.
Кондак 8
Странник во юдоли земней быв, терпения, воздержания и чистоты образ показал еси, исповедниче Луко. Егда отечество в опасности от нашествия иноплеменник пребываше, любовь евангельскую являя, деннонощно во врачевнице труждался еси, исцеляя недуги и раны вождей и воинов отечества земнаго, непамятозлобием и любовию удивляя всех творящих ти напасти, и многия сим обратил еси ко Христу, во еже пети Ему: Аллилуиа.
Икос 8
Весь исполнь любве Христовы, Луко благосерде, душу твою полагал еси за други твоя, и яко Ангел Хранитель был еси ближним и дальним, озлобленныя укрощая, враждующия примиряя и спасение всем устрояя. Поминающе труды твоя во благо людей отечествия твоего, благодарне взываем ти:
Радуйся, дивную любовь ко отечеству земному показавый.
Радуйся, смирения и незлобия учителю.
Радуйся, изгнание и жестокия муки мужемудренно претерпевый.
Радуйся, за Христа страдавый и мучим бывавый.
Радуйся, твердо Его исповедавый.
Радуйся, злобу врагов любовию Христовою победивый.
Радуйся, отче благосердый, спасения многих взыскавый.
Радуйся, великими скорбьми искушенный.
Радуйся, в гонениих терпение дивное явивый.
Радуйся, яко за враги Господа умолял еси.
Радуйся, егоже любовь всяку вражду победи.
Радуйся, егоже незлобие сердца жестокия покори.
Радуйся, святителю Крымский, исповедниче Луко, врачу благий и милостивый.
Кондак 9
Всем был еси вся, якоже и святый Павел, да всяко некия спасеши, святителю Луко, архипастырский подвиг совершая, в Тамбовстем крае многими труды храмы обновляя и созидая, уставы святоотеческия строго соблюдая, спасению паствы твоея служити не престал еси, чисто Богови поя: Аллилуиа.
Икос 9
Витии человеческия не возмогут по достоянию изрещи твоих благодеяний множество, егда явися на Крымстей земли, яко отец чадолюбивый, святителю отче Луко, щедродательная бо десница твоя всюду досязаше. Мы же, благосердию твоему подражати хотяще, во удивлении взываем к тебе:
Радуйся, лучу любве Божия.
Радуйся, сокровище милосердия Спасова неистощимое.
Радуйся, яко вся своя неимущим раздавал еси.
Радуйся, ближния твоя паче себе возлюбивый.
Радуйся, безматерних сирот питателю и окормителю.
Радуйся, безпомощных старцев и стариц попечителю.
Радуйся, яко болящия и в темнице заключенныя посещал еси.
Радуйся, яко нужды бедных во мнозех местех отечества свого предварял еси.
Радуйся, яко нищия поминая, трапезы им устроял еси.
Радуйся, яко коемуждо в горестех, аки Ангел утешитель являлся еси.
Радуйся, Ангеле земный и человече небесный.
Радуйся, яко о глубине милосердия твоего Мати Божия возрадовася.
Радуйся, святителю Крымский, исповедниче Луко, врачу благий и милостивый.
Кондак 10
Спасению крымския паствы твоея служити многолетне не преставая, по образу Пастыреначальника Христа, на рамех заблуждших взем, Богу и Отцу привел еси, надеждею бо на Божие милосердие утешая, ко исправлению жития словесы учительными твоими влекл еси вся, во еже сердцем чистым пети Богу: Аллилуиа.
Икос 10
Царя Небеснаго Христа Бога верный служитель быв, святителю отче Луко, неустанно возвещал еси слово истины во всех храмех земли Таврическия, душеспасительною пищею учения евангельскаго верныя чада питая и устав церковный строго исполняти повелевая. Темже тя, яко пастыря добраго, прославляем сице:
Радуйся, неутомимый проповедниче евангельския правды.
Радуйся, яко Богом врученное тебе стадо словесное добре пасл еси.
Радуйся, овцы своя от душепагубных волков охранявый.
Радуйся, чина церковнаго строгий блюстителю.
Радуйся, чистоты веры православныя охранителю.
Радуйся, тобою бо Дух Святый написа словеса спасительная.
Радуйся, мудрецем века сего бытие Божие проповедавый.
Радуйся, яко слово твое, аки в ризы позлащенны, в тайны веры одеяся.
Радуйся, молние, гордыню низлагающая.
Радуйся, громе, беззаконно живущия устрашаяй.
Радуйся, церковнаго благочестия насадителю.
Радуйся, архипастырю, пастыри духовныя наставляяй и вразумляяй непрестанно.
Радуйся, святителю Крымский, исповедниче Луко, врачу благий и милостивый.
Кондак 11
Пение у гроба твоего, угодниче Божий, не умолкаше во днех блаженнаго успения твого. Мнози бо, ведуще тя богоносна и равноангельна, собрашася от всех предел земнаго отечествия твоего совершити моление соборное о души твоей, в горния обители Отечествия Небесного восходящей, воспевающе Богу: Аллилуиа.
Икос 11
Свещею, в Церкви Христовой горящей светом невещественным благодати Божией, был еси, святителю Луко, вся концы земли нашея озаряя. Егда же приспе время отшествия твоего, божественнии Ангели прияша святую душу твою и в небесныя обители вознесоша. Темже, поминающе блаженное успение и велие твое на небеси и на земли прославление, с радостию приносим ти благохваления сия:
Радуйся, светильниче немеркнущий Света Невечерняго.
Радуйся, яко мнози прославиша чрез твоя добрая дела Отца Небеснаго.
Радуйся, угодниче Божий, течение благочестне скончавый.
Радуйся, веру, надежду и любовь от Господа стяжавый.
Радуйся, со Христом, Егоже возлюбил еси, на веки соединивыйся.
Радуйся, Царствия Небеснаго и славы вечныя наследниче.
Радуйся, яко свет добрых дел твоих пред человеки просветися.
Радуйся, научивый заповедем Христовым и сотворивый я.
Радуйся, архиерею, от Вечнаго Архиерея Христа благодатными дары исполненный.
Радуйся, скорый помощниче призывающим тя.
Радуйся, земли Крымския новое светило и утверждение.
Радуйся, рода христианскаго благодатный покровителю.
Радуйся, святителю Крымский, исповедниче Луко, врачу благий и милостивый.
Кондак 12
Благодать, свыше ти данную, познавше, благоговейно лобызаем честнаго лика твоего изображение, святителю Луко, чающе тобою получити просимое от Бога. Темже, припадающе ко святым мощем твоим, со умилением молим тя: укрепи нас добре стояти в вере православней и, угождающе благими делы, немолчно пети Богу: Аллилуиа.
Икос 12
Поюще Бога, дивнаго во святых Своих, хвалим тя, Христова исповедника, святителя и предстателя пред Господем. Весь бо еси в вышних, но и нижних не оставляеши, святителю отче Луко, присно со Христом царствуеши и о нас, грешных, пред Престолом Божиим ходатайствуеши. Сего ради во умилении зовем ти:
Радуйся, света неприступнаго зрителю.
Радуйся, емуже сорадуются Ангелы и о немже веселятся человецы.
Радуйся, делы и писаньми твоими неверующия просвещаяй.
Радуйся, маловерныя и малодушныя укрепляяй и утверждаяй.
Радуйся, яко достоин явился еси Царствия Небеснаго.
Радуйся, путем исповедничества райских селений достигнувый.
Радуйся, поношения Христа ради терпевый и вечную с Ним славу приявый.
Радуйся, души наша к Царствию Небесному путеводяй.
Радуйся, предстателю пред Престолом Божиим за нас, грешных.
Радуйся, Православия похвало и земли нашея радование.
Радуйся, в сонме святых быти сподобивыйся.
Радуйся, собору всех Крымских святых сопричастниче.
Радуйся, святителю Крымский, исповедниче Луко, врачу благий и милостивый.
Кондак 13
О великий и преславный угодниче Божий, святителю отче наш Луко, приими сие похвальное пение от нас, недостойных, с любовию сыновнею тебе приносимое. Предстательством твоим у Престола Божия и молитвами твоими всех нас в вере православней и добрых делех утверди, от всяких бед, скорбей, болезней и напастей, в сей жизни находящих, сохрани, от мучений в будущем веце избави и сподоби в вечней жизни купно с тобою и со всеми святыми пети Творцу нашему: Аллилуиа.
(Этот кондак читается трижды, затем икос 1 и кондак 1)
Молитва
О всеблаженный исповедниче, святителю отче наш Луко, великий угодниче Христов! Со умилением приклоньше колена сердец наших (и припадающе к раце честных и многоцелебных мощей твоих), якоже чада отца, молим тя всеусердно: услыши нас, грешных, и принеси молитву нашу к Милостивому Человеколюбцу Богу, Емуже ты ныне в радости святых и с лики Ангел предстоиши. Веруем бо, яко любиши ны тою же любовию, еюже вся ближния возлюбил еси, на земли пребывая. Испроси у Христа Бога нашего, да утвердит во Святей Своей Православней Церкви дух правыя веры и благочестия, пастырем ея да даст ревность святую и попечение о спасении паствы, вверенной им: право верующия соблюдати, слабыя и немощныя в вере укрепляти, неведущия наставляти, противныя обличати. Всем нам подай дар, коемуждо благопотребен, и вся, яже к жизни временней и к вечному спасению полезная: градов наших утверждение, земли плодоносие, от глада и пагубы избавление, скopбящим утешение, недугующим исцеление, заблуждшим на путь истины возвращение, родителем благословение, чадом в страсе Господнем воспитание и научение, сирым и убогим помощь и заступление. Подаждь всем нам твое архипастырское и святое благословение, да тем осеняеми, избавимся от козней лукаваго и избегнем всякия вражды и нестроений, ересей и расколов. Даруй нам поприще жизни временныя богоугодно преити, настави нас на путь, ведый в селения праведных, избави воздушных мытарств и моли о нас Всесильнаго Бога, да в вечней жизни с тобою непрестанно славим Отца и Сына и Святаго Духа, в Троице славимаго Бога, Емуже подобает всякая слава, честь и держава во веки веков. Аминь.